LADC-ah chabi neitu inthlak

Lai Autonomous District Council (LADC) inthlanah party mala sorkarna siam thei an awm lo a, vawiin thlengin sorkar tur a la hriat loh. Sorkar siam tura a a chabi neitu pawh an inthlak tawh.
A tirah chuan Congress party-in chabi an kawl a, an thawhpui apiang an sorkar ang. Tunah chuan pathumna ZPM-in chabi hi an kawl tawh.
Tun thlenga a lan dan chuan, ZPM-in Congress an thawhpui chuan an pahnihin sorkar intawm an siam ang a, ZPM-in an duh leh duh loh a ni mai. Chu chu Congress party-in an nghak a, MNF-in tih vak dan tur an neih loh avangin an lo thlir ve tawp bawk.
Kar hmasa Nilaini, December ni 10 zanah khan LADC inthlana pahnihna Congress leh pathumna ZPM te a thuphungin an inrem a, mahse hemi ni vek hian December ni 10-ah khan Aizawlah ZPM PAC (Political Affairs Committee) an thu a, MNF leh Congress thawhpui lo an lo rel ve thung.
Lawngtlai lamah inrem mah se Aizawl lamin ro dang an rel avangin party pahnih thawh dun tumna pawh chu a puitling thei ta lo a, Aizawl lam an nghak ta ringawt mai a ni.
Lawngtlai atanga thu dawn danin, an inrem dan chuan, Congress kaihhruai sorkar din ni se an ti a, CEM tur pawh C Ngunlianchunga a ni ang.
Inrinni tlaiah khan Aizawlah ZPM PAC hi an thu a, Congress emaw MNF emaw thawhpui chungchanga thu an lo tihtluk tawh kha an ngaihtuah. Mahse hemi chungchangah hian thu mum an nei lo nia hriat a ni.
MNF lam chuan opposition-a awm an pawi ti lo a, a theih chuan sorkar siamnaa tel ni se, a theih loh a nih pawhin opposition-a awm mai ni se tih rilru an pu tih thu dawn a ni. Congress leh ZPM inremna hi a puitling thei ta lo a nih chuan a tute emaw zawk zawk hi MNF nena indawr ve leh thei tura ngaih an ni.