Mizoram Rural Bank-in Business Vaibelchhe Singkhat (10k Crore Business) tlin an lawm; LOGO thar tlangzarhin, CSR hmangin an luangchhuak bawk

Mizoram Rural Bank-in Business Vaibelchhe Singkhat (10k Crore Business) tlin an lawm; LOGO thar tlangzarhin, CSR hmangin an luangchhuak bawk
Mizoram Rural Bank chuan Zirtawpni (12.12.2025) tlai khan MRB Head Office Auditorium, MINECO, Khatlaah 10000 Crore Total Business an tlin lawmna hun an hmang a. Pu Khilli Ram Meena, Chief Secretary, Government of Mizoram chuan he hun hi a hmanpui a ni.
Chief Secretary Pu Khilli Ram Meena chuan thu sawiin, MRB-te’n vaibelchhe singkhat zet mai business an nei thei chu a lawmpui thu leh mellung pakhat mai ni lovin an inpekna, tei rei peihna leh thawhhona tha lanchhuahna a nih thu a sawi a. Tuna Bank dinhmun a that thu te, Net NPA 0% a ni thei leh CRAR 16.80% a ni theite chu lawmawm a ti a. Nasa zawka thawk zel tur leh Mizoram Rural Bank chu mipuite dinhmun tha zawka hlangkaitu ni zel se a duh thu a sawi bawk.
Pi Sheryl L. Vanchhong, Chairman, Mizoram Rural Bank chuan kalkhawmte lawman thu sawiin, Bank dinhmun tlangpui a tarlang a. Kum 1983-a din MRB chuan tun dinhmunah District 11-ah Branch 106 a neih tawh thu leh Financial Inclusion-ah te, Sawrkar laipui leh State Sawrkarin ruahmanna a siam hrang hrangte tihlawhtlingtu leh Bank dangte nena khaikhin pawha a titha ber pawl an nih thu a tarlang a. Mipuite rin ngam Bank-ah hian anmahni duhsaktute avanga vaibelchhe singkhat business an tlin thei chu lawmawm a tih thu a sawi.
Anni bakah hian Board of Directors aiawhin Pu Tapan Kumar Mandal, Deputy Secretary, DFS, Ministry of Finance leh Regulator atangin Pu T. Lhungdim, GM & OIC, RBI, Aizawl Office te chuan thu an sawi bawk.
Vaibelchhe singkhat business tlin lawmnaah hian Chief Secretary bakah Pu T. Lhungdim, GM & OIC, RBI, Aizawl Office, Pu TH Haokholal, DGM, RBI, Aizawl Office leh Pi Mina Zoliani Joute, Joint Director, I&PR, Govt. of Mizoram te, MRB Board of Directors te bakah officer leh sawm bik mi pawimawh eng emaw zat an tel a. MRB hian mellung pawimawh tak tak a lo thlen tawh zingah cheng vaibelchhe singkhat business an tlin lawmna pual hian thahnemngai taka Bank kalsiam ngaihtuahtu Board of Directors-te zahna leh chawimawina thilpek an hlan a. Chutih rualin Pu R. Lalnunzira, Director, Agriculture Department, Govt. of Mizoram chuan a service chhunga a hun hnuhnung a hman tak avangin amah ngaihhruina thilhlan an hlan nghal bawk.
India rama Regional Rural Bank 28-te tana Logo angkhat an siam chu tlangzarh nghal niin he Logo hi Mizoram Rural Bank pawhin tlangzarhna neih zawh atang hian a hmang tan nghal a ni.
Vaibelchhe singkhat business nei tur hian Branch hrang hrangte’n theihtawp an chhuah a, tehna hrang hrang hmanga Branch titha 19-te hnenah chawimawina an hlan nghal a. Vaibelchhe singkhat business nei tura thawh hlawk bik mi 2-te hnenah chawimawina hlan an ni.
Lawmna hunah hian CSR kaltlangin MRB chuan luanchhuahna hun an hmang nghal a, hetiangin –
a) Chhingchhip PHC tan Ambulance Van
b) MYC Computer Laboratory a dah turin Chair, Table leh Computer, a vaiin Set 20
c) Helen Lowry School, Seventh Day Tlangah hostel khum 85 siamna tur
d) TB Cell, NHM-ah TB Patient 106 (Branch tinin patient pakhat tan zel) tan Food basket (basket 1 Rs. 700/- hu) thla 6 chhung atan.
Vaibelchhe singkhat business tlin lawmna hun hi Pu Lallawmzuala Colney, General Manager-in lawmthu sawiin a khar a ni.