A tur a na e

Ruihhlovin Mizoram a tibuai a, kuminah mi 80 chuangin ruihhlo vangin nunna an chan tawh. Mizoram Excise & Narcotics (MEN) department chuan December ni 17 thlengin kuminah mi 88-in ruihhlo vangin nunna an chan tawh tiin an chhinchhiah.
An chhinchhiahna enin, December ni 2 thleng khan ruihhlo vangin Mizoramah kuminah mi 83-in nunna an chan tawh a, December ni 2 thlenga nunna chan zat enin, 2025 hi 2005 hnua ruihhlo vanga nunna chan an tam ber kum a ni tawh. Chumi hnuah mi paliin nunna an chan leh tawh.
Kumina nunna chante hi mipa 74 leh hmeichhia 14 an ni a, a naupang ber chu kum 17 mi, a upa ber chu kum 57 mi a ni.
Mi 88-te zinga 34 chu heroin vanga nunna chan an ni a, mi dang 54 chu ruihhlo chi hrang hrang vanga nunna chan an ni. Mi 54-te zxinga 50 chu heroin leh damdawi ruihhlo dang khawih pawlh an ni a, pakhat chu alprazolam vang niin, mi dang pahnih chu an vanduaina thlentu ruihhlo hriat loh a ni.
Kum hmasa 2024 khan mi 67-in ruihhlo vangin nunna an chan a, 2023-ah mi 76-in, 2022-ah mi 43-in nunna an chan.
1984 atangin MEN department hian ruihhlo vanga nunna chan zat hi an chhinchhiah a, 1984 atanga kumin December ni 17 thlengin mipa 1727 leh hmeichhia 240, an vaiin mi 1967-in nunna an chan tawh.
Tun hnai kum 10
chhunga ruihhlo
vanga nunna chan zat
2016-ah mi 59
2017-ah mi 65
2018-ah mi 56
2019-ah mi 55
2020-ah mi 67
2021-ah mi 47
2022-ah mi 43
2023-ah mi 76
2024-ah mi 67
2025-ah mi 88
(Dec 17 thleng)