Mizoram Basketball Team Fehchhuak Mizoram 60-68 Bihar
Mizoram Basketball Team Fehchhuak
Mizoram 60-68 Bihar
75th Senior National Championship chu January ni 4 atanga ni 11, 2025 chhung hian Chennai, Tamil Nadu-ah khelh a ni ang. Mizoram team chuan January ni 3 khan Aizawl an chhuahsan a, Mizoram team te hi Group F ah Himachal Pradesh, Bihar leh Telangana te nen an awm.
Kristiante hunpui vanglai tak leh national championship hi tum dang ang bawkin a innang leh a, MBBA puipa lam ngenna angin inelna tan hun hi Basketball Federation of India (BFI) lam hi an tawlhhnung hret nachungin Mizoram team hian inbuatsaihna hun an nei tha tawk lo! Bihar lakah 68-60 in Mizoram team hi an 1st match-ah an tlawm nghal; inelna khelhna hmun hi Mizoram team in zing dar 2 bawrah thlengin hotel-ah an innghat a, chauh pawh sawi hman lovin zing dar 6-ah an inkhel tan lehnghal – darkar 4 vel chauh hahdamna hun an nei chungin pumruaa lian zawk hi an lehthal teuh hle.
Mizoram Squad
1. Lalrozama Kanan (Chanmari BC)
2. Lalnunsanga Kanan (Chanmari BC)
3. Vanlalruata Ainawn Veng (Chanmari BC)
4. Samson Lalchhuanawma Chaltlang (Chanmari BC)
5. Lalhmangaihzuala Nursery Veng (Khatla TBL)
6. Lalsangliana Zotlang (Khatla TBL)
7. Biakmuanpuia Saron Veng (Saron BC)
8. H. Lalhmachhuana Khatla South (Zarkawt BCA)
9. Malsawmkima Hmar Khatla East (Zemabawk BC)
10. Lalropuia Khatla South (Zemabawk BC)
Manager – Michael Zohmingsanga Khatla (MBBA Exco. Member)
Head Coach – Vanlalnunsanga Ralte Khatla East (Chanmari BC)
Hoops Mania Time Out
MBBA 3×3, 2025 inelna chu December ni 11 khan huang (categories) 6-ah neih a ni a, hemi tum hian senior men huangah bik team an awm loh avangin khelh a ni lo. Sr. player thenkhatin Mizoram pawnah inelna an khel thung a, tualchhunga Sr, player tam tak erawhin 3×3 intihsiakna hi an hlut tawk lo tih erawh a chiang. Hetiang boruak karah erawh hian MBBA lam chuan a senior player chhawr theih loh neih nual mah se, senso hautak zet nen tun tumah hian Mizoram team hi a tir cheu.
Hun hmasa lamah erawh MBBA tirh Mizoram team te hian hlawhtlinna leh result tha an rawn hawn fo va, player-te hian state sorkara an chet thatna hi hna zawn nan an chhawr tlat ta lo – hei hi zirchian leh bihchian ngai lai a ni.
India ramah hian a thei leh thiam aiin duhsakna uchuak taka dawngten hamthatna an lo chang fo tawh tih hi sports huangah bik phei chuan ring taka sawi thin a ni. Infiammiten he thil hi an hmu ve kiau a, an hlawh hmuhna club lam an ngaihpawimawh a ngai fo.
Sr. player chin ngat phei chuan eizawnna lama insawrbingte a lo ngaih tawh avangin Mizoram aiawha koh an nih apianga kal a remchan bik lohna te hi thlir thiampui an ngai ve a, senso tam tak nena team tirh hian player-te bik hi an kal zelna turah chuti tehchiamin a pui tlat lo lai hi mutan a ni!
Infiamna huang dangah chuan mahni state aiawha an fehchhuah hian club liana luh theihna remchangte a awm thin a, hei hi India ram basketball huanga a thlen dik ve hleih theih rih tlat loh avangin tualchhung lama senior player tam takin Mizoram Super League (MSL) inbuatsaihna vung vanglaia an hlawh hmuhna club lama an bet hi an hriatthiamawm viau.
Heng karah hian MSL club lamin an player-te Mizoram aiawha chhuah an phal sak hi an fakawm viau. A tirtu MBBA dinhmun erawh sum hmuhna pachhe tak kara fei taka a insengso ngam hi, MBBA fakna hla sa hlei thei ngai lo tan pawh tun tum bikah hi chuan fakawm tak a ni.
Hlawh leh sum awm lovin sr. player-te tan hian koh ruala inkhel tura inpeih at hi a theih tawh loh. Infiamna hi mi tin tana hlawkna hlawhchhuah vek a theih lo va, tun dinhmuna kan sr. player tha ber ber te pawh hian eizawnna innghahna tlak zawk an buaipui a ngai dawn – hringnun inkhaidiat hi sr. player-te pawh hian an zawh ve a ngaih miau avangin basketball court-ah hian kan hmu tlem tial tial ang; hnah hlui erawh hnah tharin an rawn thlak ang a, anni pawhin an vanglai a pelh fel hmain eizawnna huang dangah min liam san zel ang – hei hi India ram a ni e.