Karlehah Denmark nen Greenland kan sawi dawn – Rubio
US Secretary of State Marco Rubio-a chuan America-in Danish ram peng pakhat, Greenland neih tuma thawm a neih chungchangah kar thar hian Denmark nen an inbe dawn tih a sawi.
Rubio-a’n hetiang thu a sawi hi US senator-te nen an indawr hnuah a ni a. A hma ni chiah khan White House chuan US President Donald Trump-a’n Greenland an luah theih nan a tul chuan sipai chakna thlenga hman mai an tum thu a sawi thawi a ni.
Inrinnia Trump-a’n a sipaite tira Venezuela luhchilha President Nicolás Maduro-a a man hnuah thliarkar ram hma lam hun hian ngaihven a hlawh thar zual.
Trump-a sorkar hian Greenland hi US himna atan a pawimawh tih an sawi a. Denmark chuan an bei a nih vaih chuan Nato sipai tanrualnain a tuar dawn tih a sawi ve thung.
“President-in ram himna a derthawng tih sawi chuan tu president pawhin sipai chakna thlenga hman hi an sawi ri ngei ang,” tiin Rubio-a chuan Nilaini khan a sawi.
“Palai ka nih ang leh kan thawh mek angin, kawng danga thil kalpui kan duh reng a, chu chu Venezuela chungchangah pawh khan a ni,” a ti.
Nilaini vek khan French Foreign Minister Jean-Noël Barrot-a chuan Rubio-a nen phone-a an inbiaknaah Greenland ‘run mai chu thil thleng thei lo’ a nih loh thu a sawi tih a sawi bawk.
Barrot-a hi German leh Polish foreign minister-te nen a awmna hmun avanga pawimawh tak, Arctic thliarkar chungchang hi Nilaini zan khan an sawiho nghe nghe.
Thawhlehni khan European hruaitute chuan thuchhuah intawm siamin Denmark lam an tan thu leh Trump-a’n neih a tumna tha an tih loh thu an lo puang tawh bawk.
“Greenland hi a mipuite ta a ni a, Denmark leh Greenland chauhvin ram dang nena inkungkaihna chungchangah thutlukna an siam thei a ni,” tiin France, UK, Germany, Italy, Poland, Spain leh Denmark hruaituten thu an chhuahah hian an tar lang.
Greenland hi mahni kea ding ram pakhat chiah a la ni lo va, inrelbawlna tam takah chuan mahni kea ding angin awm mah se an himna leh ram dang nena inkungkaihna thilah chuan Denmark thuhnuaia la awm an ni a. US hian an himna atana hman atan a awt hle a ni.