Sairang Rel Station-a parking fee khawn danah FIR tintuah

Sairang Rel Station-a parking fee khawn danah FIR tintuah
Congress Thalai Hqrs. hruaitute chuan Zirtawpni khan Sairang Rel Station-a mipui zin veivak lirthei lut leh chhuak atangin parking fee khawn chungchanga harsatna a hmunah tlawhin Station manager Guddu Kumar an kawm a, lirthei lut leh chhuak leh parking hmunhma an enfiah bawk.
Congress Thalai president Laltawnliana chuan, lirthei lut leh chhuakah Rs.50 mai ni lo, zirtirtu training mekte bus-ah pawh Rs.100 chawitir lai an hmu tih sawiin, receipt-ah a khawntu organisation emaw thuneitu emaw hming a chuang lo a, competent authority-in fee khawn tur a nih chuan order a chhuah tur a ni tih a sawi a. Order copy hi January 13 ralhmaa pe turin a ngen tih a sawi a ni.
Parking fee khawn hi Mizoram mite kutah awm angin lang mah se, hnamdang license hmanga tender hi chhan a ni a. Railway thuneitute hnenah kum thum chhungin cheng nuai 70.07 chuang an chhun luh a ngai tih sawiin, “Hemi avanga mipui mimir tana harsatna tur khawpa parking fee sang taka lak hi a duham thlak a. Mizo leh hnamdang insumdawn tawmna kan huat em em lai a, rel station-a hnamdang leh Mizo an inkawp pawh hi kan hrethiam lo hle. Mizoramah chuan Mizote chhan theihin parking fee khawn tender hi Railway thuneituten siam se a tha hle a ni,” a ti.
Lirthei dahna tur hmun bik mumal leh fel tak pawha siam ni lo, vaivut kara lirthei dah leh zinmite indahna hmun, lirthei dahna hmunhma (parking facilities) peihfel a nih hmaa, Railways lamin parking fee khawn tender, sum demand sang lutuka an chhuah chu a chhangtu leh khawntu Mizote a timualpho hleah Congress Thalai chuan a ngai tih Laltawnliana hian a sawi a. Tender chhangtuten sum an thehluh zat tur leh a hun chhung pawh lirthei dahna hmun peih fel a nih atang chauha tan turin an ngen tih a sawi a ni.
“He thil hi chinfel a nih hmaa sum khawn a nih zel chuan, Congress Thalai chuan na zawkin hma a la dawn a. Parking fee khawn hi competent authority-in an tih tir a nih loh phei chuan mipui rawkna leh bumna a nih avangin dan angin mipui tan FIR kan thehlut dawn a ni,” a ti.