Sky surfing sang record siam

Vurah te, tuiah te tawlh/tleng nana an hman thin a kea vuah chungin van dang takah helicopter atangin a zuang chhuak a, Himalaya tlang chungah ngei sky surfing tiin, Guinness World Record a siam.
A hming chu Olga Naumova a ni a, Belarus a cheng, nu rorum tak a ni. Sky surfing hi kum 15 vel zet chu a lo buaipui tawh a, tichuan, nikum November ni 10 khan helicopter-ah chuangin, Synagboche, Nepal chungah an thlawk kang ta luah luah mai a, feet 20,945 a sang atangin helicopter atang chuan a zuang chhuak a, record a siam ta a ni.
Helicopter atanga a zuan chhuah hian a board a bun sa vek a, boruakah a han vir kual deuh zak zak a, chutah a parachute pawt pharhin, feet 12,356 a sangah a tum ta a ni. Naumova hian skydive hi vawi 17,000 chuang a lo ti tawh a, mahse, hetiang khawpa sang atanga free-fall drop hi chu khawvel mihring zingah tuman an la ti ngai lo a, ani hi a hmasa ber a ni ta a ni.
Naumova chuan, “ Sky surfing ka tih tan atangin, skydive dangdai deuh tak, hmeichhe dang chophur thei tur tih ka chak nghal a, huaisen taka thil pui tham tak suangtuah ngamna thinlung nei tura ka fuih theih nan ka ti a ni,” a ti.