January 15-a Mock Drill neih dan tur sawi ho

January 15-a Mock Drill neih dan tur sawi ho
January 15, 2026-a Mizoram pum huapa Mock Drill neih tur chungchangah nimin khan Serchhip DC Paul L Khuma hoin Serchhip DC Pisapui Hall-ah thuneitute an thukhawm a, Serchhip-a mock drill neih dan tur chungchang an sawi ho.
DC Paul L Khuma chuan lirnghing a lo thlen thulha chhiatna thleng kan hmachhawn dan tur inzirna Earthquake Mock Exercise neih tura mawhphurtute zawng zawngin theihtawp chhuah turin a ngen a. Lirnghing a lo thlena chhiatna chi hrang hrang thleng thei te zir a nih dawn avangin, a mawhphurtute mai bakah mipui mimir tan pawha tangkai a nih ngei a beisei thu a sawi.
January 15-ah hian mock exercise hi chhun leh zanah neih a ni dawn a. A hmasa zawk hi chawhma dar 10 ah tanin hmun hnih – Serchhip Bazar leh Serchhip Government Higher Secondary School ah te lirnghing avanga building chim, kangmei chhuak, electric leh inbiakpawhna line chhiate a thleng ang a. Chawhnu dar 1 ah exercise neih zawh hnuah thlirletna hun (debriefing) chu DC Office-ah neih a ni ang.
|hutkhawmah hian mawhphurhna hrang hrang insiamrem leh inruat a ni a. Hmalak dan tur leh tihtur te inhrilhhriat a ni a. January 14, 2026 (Nilaini) hian chhiatna thlenna tur hmuna chetla tur leh nunchan zir turte chu chiang leh zuala an tihtur te inzirtirna hun an hmang dawn bawk a ni.
Nimina thutkhawmah hian District Administration hotute, department hrang hrang hotute, Assam Rifles, BSF, YMA, MUP, mock exercise neihna tur hmun VCP te leh Bazara sumdawng aiawhte an tel a ni.