Australian Open-a tennis fan-te dawn theih tur USD 6.71 million!

Pathianni atanga khelh tan tur Australian Open men’s or women’s singles draw-a match 127 khelh tura result ring dik kim vekte tan organiser lamin hamthatna lian zet an duangchhuak a, he mi atan hian US dollar maktaduai 6.71 zet dah a ni a, chu chu tournament khelhna ram pawisa Australian dollar zawng chuan maktaduai 10 zet a tling!
He thu hi Thawhlehni khan tournament organiser-te chuan puangin, he chona hi a hmingah ‘Bracket Challenge’ tih a ni.
Australian Open match tina chak tur ring dik vek fans tana an sum tawktarh hi a tlem chhe lo khawp mai.
Tennis Australia Chief Commercial Officer Cedric Cornelis chuan chona an chhawpchhuah chu risk satliah leh chance tihfuha innghat ngawt a nih loh tur thu leh tennis game hriatthiamna leh thlir thiamna (game of skill) sawrchhuah tumna leh chuti lama innghat a nih tur thu a sawi.
Cornelis chuan, “AO Bracket Challenge hi tennis game hriatnain a hrinchhuah tur lawmman hnuhchhuah theihna niin, he tournament nena inngheng thin fans tan kumin hian a phurawm zual dawn ta a ni,” a ti.
He inelna hi kumin chhunga Australia rama chengte tan chauha buatsaih a ni thung a; he chona kaltlanga sum beisei turte chuan naktuk, Ningania singles draw tarchhuah a nih chiah atangin match tina an rin dan (bracket prediction) kim chang an thehut thei dawn a, Pathiannia match hmasaber an tan hma thlengin an rinlawk dan hi an thehlut thei ang.
Ring dik kim lote tan pawh consolation prize an la siam fo dawn a, draw tina ring dik tam (highest-scoring brackets) tan Australian dollar 10,000 dah a ni.
Tarlan tawh thin angin, Australian Open hi tun January ni 18 atanga February ni 1 chhung hian Melbourne Park-a khelh tur a ni.