Chris Stapleton ‘Tennessee Whiskey’-in RIAA record siam

Country star Chris Stapleton chuan Recording Industry Association of America (RIAA) mel lung tar kaiin, a hla hit ‘Tennessee Whiskey’ chuan RIAA double Diamond certification a dawng ta a, country hlaa RIAA double Diamond kai thei hmasa ber a ni.
RIAA Diamond certification hi US-a hla maktaduai 10 hralh tlin theih chhinchhiahna niin, double Diamond chu US-ah maktaduai 20 hralh theih chhinchhiahna a ni a, country hla tlangzarh tawh zawng zawng ‘Tennessee Whiskey’ chiah hi RIAA double Diamond certification nei thei a la ni.
RIAA chairman/CEO Mitch Glazier chuan, “Chris Stapleton-a aw mawi danglam tak leh hla hmanga thawnthu a phuah thiamna hian mi a hneh thei hle a, chart-ah pawh a hlawhtling a, award a dawng nual tawh a, a pawimawh ber fans lamin an ngaina bawk. RIAA pawhin ‘Tennessee Wiskey’ history siam thu puan hi kan phur hle a, country hla zinga Double Diamond certification nei hmasa ber niin, US-ah maktaduai 20 an hralh tling ta a ni. Hetiang hlawhtlinna hi a chhinchhiah tlak le a, Stapleton-a career-ah hun ropui tak a ni,” a ti.
Stapleton hian 2015 khan Dean Dillon/Linda Hargrove hlapuah ‘Tennessee Whiskey’ hi tlangzarhin, Billboard Hot 100 (US singles) chart-ah No.20 a kai pui a, Billboard Hot 100 chart-a a lan tanna a ni nghal a, a hnu lawkah Justin Timberlake nen 49th annual CMA Awards-ah ‘Tennessee Whiskey’ leh Timberlake hla ‘Drink You Away’ an perform dun nghal bawk a, heta tang hian rimawi khawvelah a rawn invawrh chhuak ta tak tak a ni.
Hemi tum CMA Awards-ah hian Stapleton a che tha le a, ‘Traveller’ avangin album of the year a dawng a, new artist of the year leh male vocalist of the year a dawng bawk.