Mi 32 delh hlum tukah crane tlu vang bawkin mi pahnih thi leh

Mi 32 delh hlum tukah crane tlu vang bawkin mi pahnih thi leh
Thailand-a rel tlan lai chunga thil rit khai kualna (crane) tlu avanga mi 32 an thih tukah chiah kawngpuia hetiang bawk hi tlu lehin mi pahnih an thi leh.
Ningania crane tlu hi Bangkok dai, Samut Sakhon-a expressway siam laia hnathawhnaa hman lai a ni a. A tlu lai video darhah chuan kawngpuiah tlain car leh vaivut khu bakah a tla darh a leng nasa hle.
Nilaini khan hmarchhaka Nakhon Ratchasima province-ah rel tlan lai chungah crane tluin thi bakah hliam tuar mi 60 chuang an awm.
Chhiatna thleng pahnih enkawltu hi company thuhmun, Thailand-a thil liantham siam leh satu lian ber, Italian-Thai Development an ni.
Ningania Italian-Thai Development-in thuchhuah an siamah chhiatna thleng pawi an tih thu an tar lang a, hliam tuar leh thihna tuar chhungkuate an tawrhpui tak zet tih an sawi.
Zangnadawmna pek vek an tum a, chhiatna thleng nghawng nat dan hi an buaipui nghal mek tih an sawi a. Company chuan him zawka hna an thawh theih nan an kal dan an ennawn nghal dawn tih an sawi bawk.
Ni hnih chhunga thil thleng hian Asia chhimchhak rama hna thawhnaa himna dan zam tha lo leh zawm hlawh lo nasa lutuk a lantir nia ngaihna a lian nghal hle.
Kum sarih liam ta chhungin Bangkok atanga an ram chhim lam pan kawngpui siam leh sialnaa chhiatna thlengah mi 150 vel thi an tawh.
Ningania chhiatna thlenna expressway pawh hi tun hnaiah chhiatna a thlen fo tawh avangin ‘Death Road’ tia sawi a ni tih news agency AFP-in a tar lang.
Thai Prime Minister Anutin Charnvirakul-a chuan Nilainia thil thlen hnu khan transport ministry hnenah Italian-Thai Development chu an hnathawh phalna hlipa blacklist-a dah turin a ti a, hrem turin a ti bawk tih a sawi.
State Railway of Thailand pawhin Italian-Thai Development lakah hian dan anga hmalakna tur hriattirna a pe bawk.
He company hi nikum March thlaa lirnghinga Bangkok in chhawng sang sak lai chim thawktute tho kha an ni a, khatah pawh khan khawpuia in dang engmah a chim loh laiin an sak lai mek chiah a chim a ni.
In sak lai chim avang hian company president bakah an designer leh engineer eng emaw zat chu an hna thawha inthlahdah thubuai siamsak an lo ni tawh.