2025-ah state pawn mi nuai 8.41-in min tlawh: – Tourism minister

Kum 2025-ah state pawn mi 8,41,322-in Mizoram an tlawh a; hei hi kum 2024-a tlawhtu aiin zaa 96.9 in a tam tih Tourism minister Lalnghinglova Hmar chuan a sawi.
Aizawl International Half Marathon (AIHM) 2026 neih tur leh Mizoram tlawh tura mipui sawm pahin Nilaini khan Sports & Youth Services leh Tourism minister Lalnghinglova Hmar hian Guwahati Mizoram House-ah Assam leh national media te a kawm a. Hetah hian a chunga tarlan hi a sawi.
Covid-19 boruak reh hnuah a kum telin Mizoram tlawhtu an pung tih sawiin, state lian zawkte nen khualzin zat ngau ngau khaikhin chi ni lo mah se, kum 2023 atanga 2024-ah zaa 130 chuangin Mizoram tlawhtu an pung a, kum 2025-ah pawh a let deuhthaw, zaa 96.9-in an la pung tih a sawi.
“Hei hian Mizoram chu tourist-te tlawh chak ber zing ami a ni zel tih a lantir a, kum 2026-ah pawh India rama tourist destination thlanawm ber zingah kan tel ka ring a ni,” a ti.
April 2025-ah Mizoram Sports & Youth Services department leh Innovations India-in a vawikhatna atan AIHM an buatsaih tih Sports minister hian a sawi a. Lirthei leh thlawhna hmang chauha Mizoram kal theih a ni chungin AIHM 2025-ah state pawn mi thahnem tak an tel a. Athlete, official leh mipui nawlpuiin an hlut hle tih a sawi.
Tunah chuan Sairang thleng rel a lut tawh a. Mizoram chu Guwahati rel station atangin tlai khatah a thlen theih a, thlawhna phei chuan minute 40 thlawk a ni tiin, AIHM 2026-ah chuan state pawn, a bikin Assam atangin tam lehzual an tel ngei an beisei tih a sawi a ni.
Innovations India managing director Rahul Bali chuan AIHM chu Athletics Federation of India-in a pawmpui bakah Sports Authority of India, North East Frontier Railway leh National Cadet Corp-in an thlawp tih a sawi.