A lerah Barca chuang chhuak leh nghal

A lerah Barca chuang chhuak leh nghal
Inrinni zanah Real Madrid-in an hmahruaina chhuhsak zuai mah se Pathianni zanah 3-0 hnehna nen an kawtkaia point thum hlawhchhuak chungin Barcelona chuan Spanish La Liga table-a an hmahruaina an luahkir leh nghal.
Spotify Camp Nou-a mipui 44,763 chhuak khawm hmaah chak mamawh Catalan-ho hian chawlhlawk hmain an mikhual Real Oviedo lakah goal an khung zo lo a; second half tir lamah Dani Olmo chuan home supporter hlauhthawnna thiatin goal hmahruai a khung a, season kal laia league goal ruk a thunna chiah a ni.
Olmo goal luh atanga rei lvak lo minute 57-ah Raphinha chuan David Costas tihsual nangchingin Oviedo goalkeeper Aaron Escandell-a ven goal-ah si hnih faia mualneitu team hmahruaina goal thawh ve lehin, Spain forward Lamine Yamal-a bicycle kick goal nen si thum faiin Barcelona an chak a, La Liga table-ah point khat bawkin Real Madrid chungah an thu zui leh ta a ni.
Tun kha boss Hansi Flick-a hnuaia La Liga bika an khelmuala Catalan team vawi 10 chakna chiah niin, December 2019 daih tawha Ernesto Valverde hoa home match hnehna tum 14 an chan hnua an khelmuala Barca vawi 10 chak tlin leh vawi khatna chiah a ni.
Barcelona hian Champions League league phase hnuhnungber khelin Nilaini zan hian Copenhagen an mikhual zui leh dawn a, top eight luaha play-offs khelh buai ngai loa knock out round thleng turin chak an mamawh ang.
Camp Nou ruahsur hnuaia chak Barcelona hian khelh 21-a point 52 hum chungin title race-ah pole position an luahkir leh a, Real Madrid lakah point khata sangin, pathumna Atletico Madrid chuan point 44 an nei ve tawh bawk.