Mizoram Muaythai team medal lak dan

Mizoram Muaythai team medal lak dan
Nimin lam chhuakah January ni 23-25 chhunga Telangana, Hyderabad-a khelh zawh tak 7th Senior National Muaythai Championship 2026-a Mizoram team-in gold medal panga, silver pathum leh bronze medal pali an lak thu tarlan a ni tawh a, kan medalist-te medal sualchhuah dan kimchang kan han tarlang nawn leh ang e.
Manager Vanlalhmuaka leh assistant manager Liansangpuii Renthleite tarlan danin:
Aizawl Chanmari tlangval Issac Lalchhuanmawia chuan gold medal a lakna kawngah unanimaous decision vekin hnehna a chang.
A match hmasa berah Andaman & Nicobar Islands fighter hnehin, 2nd match-ah Delhi fighter paltlang lehin, 3rd match-ah Manipur player a hneh a, final-ah Maharashtra aiawh beiseina a tihtawpsak leh ta a ni.
Khatla East player Vanlaldingngheta chuan a bultanna inkhelah Kerala mi chu TKO-in a tlawm a; match hnihnaah Meghalaya aiawh chu unanimous decision hmangin a hnawtchhuak a; 3rd match-ah Madhya Pradesh player chu TKO bawkin a tuktlawm leh a; final-ah Rajasthan aiawh chu unanimous decision-a hnehin gold a awrh zui ta a ni.
Edenthar tlangval C. Lalmalsawma ve thungin a match khatnaah Meitei tlangval chu TKO-in a vel a; second match-ah unanimous decision-a Madhya Pradesh mi hneh lehin, third match-ah Meghalaya player chu unanimous decision bawkin a tuktlawm leh a; final-ah a thlengtu state Telangana fighter hmachhawnin, first round lekah TKO-a um chhuakin gold medal a hmin.
Tuithiang Veng star Zomuanpuia chuan semi-final match-a Nagaland fighter a hmachhawn laiin ring huh a rap fuh palh a, a tluk hnuah referee-in game stop mah se Naga pa hian a va pet lui hram a, disqualification hmangin Zomuanpuia hi chaka puan a ni. Final 3rd round-ah KO hmangin Rajasthan fighter a tuktlawm a, gold a hmin.
Zomuanpuia hi waikru (muaythai lam) intihsiaknaah tel bawkin, hetah hian bronze medal a hlawh chhuak bawk.
Selesih tui liak Paul HD Lalruatkima chuan a 1st match-ah Madhya Pradesh aiawh chu second round-ah TKO-in a hnawt chhuak a; 2nd match-ah Meghalaya mi chu 2nd round-ah KO-in a hneh leh a; 3rd match-ah Telangana player chu RSC (referee stop the contest) hmangin a paltlang a; final-ah Rajasthan mi nen in machhawnin, split decision-in a chak lo a, silver medal a la.
Phuaibuang chhuanvawr Joseph Vanlalhruaia chuan a 1st match-ah TKO-in Rajasthan player a paltlang phawt a; a dawtah a tumpui Madhya Pradesh mi chu RSC (injury) hmanga kalsan lehin, final-ah Goa fighter nena an intum laiin a ban vawi thum ngawt a tidawk a, referee-in inkhel a tihtawp a ngai a, silver medal a lungawipui mai a ngai ta a ni.
Kolasib College Veng tlangval Lalrinhlua ve thungin quarter-final lamah Telangana aiawh chu unanimous decision-a hnehin, semi-final match-ah pawh chuti bawk chuan Assamese a paltlang leh a; final-ah Kerela fighter ngam loin silver medal a dawng.
Hunthar Veng tlangval Lalngaihawma’n a match khatnaah Kerela mi chu unanimous decision hmangin a hneh a; second match-ah Assam aiawh chu KO-in a vel a; semi-final lamah Madhya Pradesh nen inhmachhawnin a vanduai zawkah a tang a, split decision hmanga tlawmin bronze medal a awrh.
Aizawl Dinthar veng tlangval RC Rohlupuia ve thung chuan inkhel hah loin quarter-final a paltlang a, walk over hmanga chakin, semi-final lamah Tamil Nadu fighter nen inhmachhawn laiin a vanduai ve ta thung a, a ban dawk vangin RSC (injury) hmanga chak loa puan niin, bronze medal bak a puitlin zo ta lo.
Chawlhhmun North tlangval Ngurlianzuala Sailo chu knock out round-ah walk over hmangin a chak phawt a; quarter-final lamah Andaman & Nicobar Islands fighter chu TKO hmangin first round lekah a hneh a; semi-final bout-ah Karnataka lam mi chuan unanimous decision hmangin a hneh hlauh a, bronze medal a awrh.
Ngurlianzuala hi waikru intihsiaknaah tel bawkin, hetah hian gold medal a la thung.
7th Senior National Muaythai Championship-ah hian state 26 atangin fighter 355 an chhuak a; fighter ngah zual state Rajasthan-in team champion nomawi chawiin, 1st runner up chu Meghalaya an ni a, 2nd runner up team chu Manipur an ni thung.
Mizoram team coach Lalchhuanawma chuan National Championship hautak tawhzia sawiin, duh thala inpuahchahna hun nei lo chunga an naute hlawhtlinnaah a lawm thu a sawi a; state dangte pawhin a hma an sawn tawhzia sawi tel bawkin, Mizo fighter-te pawh an tan zual sauh sauh a ngaih thu a tarlang tel.
Vawiin, Ningani hian Mizoram team-te hi Sairang rel station rawn thleng tura beisei an ni.