Zunthlum leh BP sang tana ‘walk’ dan \ha

‘Walk’ hi damdawi angah kan ngai thiam chiah thin lo, a aia exercise lak dan tha zawk kan ngaihtuah a, ‘walk’ ringawt chu exercise lak danah pawh a ho deuh riauin kan hre thin. Mahse, chutiang a ni lo, mihring taksa tana exercise lak dan tha ber zinga mi a ni tlat. Tun tumah hian Times of India-in taksa hriselna atana ‘walk’ thatna ni a an sawi te kan rawn tarlang e.
‘Walk’ chu ke a kal tihna a ni mai a, blood sugar (zunthlum) control nan, blood pressure (BP) sang tur venna, weight management, mental health leh ruhchuktuah exercise atan a tha hle a ni. Mihring taksa siam hmangah ke a kal tur kan nih avangin ‘walk’ chu kan taksain a haw lo a, sil them thum leh taksa na leh chau lutuk a tih pawh a ngai ve lo.
Walk hi mitinin kan tih theih, engmah hmanraw dang ngai lo, inbuatsaih vak pawh ngai chuang lo, sum sen belh ngai miah lo a exercise lak theihna a ni. Zingkarah kan walk theia, zan lamah pawh kan walk thei a. Thil ngaihtuah chungin kan walk thei a, inbe mawlh mawlh chung pawhin kan walk thei a, rimawi ngaithla chung pawhin kan walk thei. Kan mamawh chu pheikhawk leh hun tlem insiam a ni mai.
Mi tam takin walk ringawt chuan kan taksaah danglamna a thlen pha lo niin kan ngai a, thenkhat chuan rei tak walk kher loh chuan awmze nei pha lo turah kan ngai bawk a. |henkhat chu thlan a tlak kher loh chuan kan ngaih a tha lo bawk.
Diabetes & Weight Management Clinic a Internal Medicine & Metabolic Physician, Dr Vimal Pahuja, MD chuan, “Marathon tlan ang thawthang a beih a ngai chuang lo. Nitin minute 30-45 kan kal dan pangngai aia chak deuh hleka kal hi a tawk viau a ni. Pen 10,000 a huphurhawm i ti a nih chuan 7,000 pawh tum mai rawh, chupawh chu a tha tawk em em a ni. Kal chak danah pawh chak fua fua a ngai chuang lo, zai ni lo i tawngpah theih tawk vela chak kha a tawk,” a ti.
Kan kal thui leh pen tam lam aiin kan chetvel dan te, kan tih-regular dan te a pawimawh a. Kal pangngai aia chak deuh hleka kal kha a tawk viau a, lungphu tlema han tirang ve thei deuh tur kha a tawk viau a ni.
BP sang tan chuan zingkar walk hi a tha hle a, chutihlaiin zunthlum (blood sugar) control nan chuan chaw ei kham atanga minute 15-20 hnu vela walk a tha ve leh thung.
A nih leh ‘walk’ chu damdawi ei aiah a hman theih em? Dr Vimal chuan, “Pre-diabetes emaw early-stage Type 2 tan chuan regular taka walk hian damdawi ei ngai lo turin min la siamthat leh theihna kawng a awm a. Mahse, zunthlum tawh tan chuan damdawi thlah ngawt tur a ni lo a, walk hian insulin sensitivity a siamtha a, kan damdawi dose a tihniam thei bawk,” a ti.
Dr Vimal chuan zanriah ei khama minute 15 vel ke a han teihawi mai mai te hian a tuka fasting sugar a tihniam ve thei niin a sawi bawk.