Kan thiante ngenna vangin US kan be dawn – Iranian president

Kan thiante ngenna vangin US kan be dawn – Iranian president
Iranian President Masoud Pezeshkian chuan ‘an chhehvela an thian tha sorkarten’ an ngen avangin US-in inbiak a rawtna chu chhan Iran-in a chhang dawn tih a sawi.
X-a Pezeshkian-a’n a tar lan dan chuan Foreign Affairs Minister Abbas Araghchi-a biain ‘boruak tha tak hnuaiah, zalen leh engmah intiamkam lawkna awm sa lovin’ inbe tura ruahmanna siam theih dan tur a sawipui tih a sawi.
Iranian president-in hetiang thu a sawi hma lawk hian an ram supreme leader Ayatollah Ali Khamenei-a chuan Iran-in beihna a tawh vaih chuan ‘an awmna bial chhunga indona’ a chhuak dawn tih a sawi lawk.
US President Donald Trump-a hian Iran-in nuclear neih a tumna leh tun hnaia mipuiin an sorkar duh lohna an lantir a hmachhawn dawn avangin inrawlh a tum a, a sipaite pawh a chhawp hnai bawk.
“Inbiakna tura ruahmanna hi kan ram himna leh thatna tur hnuaiah ngei kalpui tur a ni,” tiin Pezeshkian-a chuan a tar lang.
Zirtawpni hian Istanbul-ah ram pahnih aiawhte hi an inbe dawn niin US chanchinbute chuan an tar lang tawh hlawm.
Pezeshkian-a’n US nena inbiak tum a nih thu a puan hma lawk hian Araghchi-a pawhin CNN-in an kawmnaah ‘inremna kan siam ngei ka ring’ tih a lo sawi ve tawh bawk.
Thawhtannia White House-a thuthar lakhawmtute a kawmnaah Trump-a chuan ‘eng emaw thil kan sawi chhuak a nih chuan a ropui hle dawn’ tih a sawi a, a nih loh hlauh thung erawh chuan ‘thil chhe tak a thleng zui ang’ a ti bawk.
US hian nikum khan Operation Midnight Hammer tia a hming vuahin Iran-a nuclear hmunhmate a lo kap tawh a. Hemi hnu lawkah hian Israel chuan bei zuiin Iran-a nuclear hmunpui leh an nuclear scientist-te a bitum zui leh bawk.
Trump-a hian ‘sipai chak takin’ Iran an pan tih a sawi a, heng zingah hian indo lawng ‘lian ber leh tha ber’ pawh a tel tih a sawi a. US sipai leh navy inchhawp hnai zingah hian indo thlawhna 70 vel phur thei lawng lian (air craft carrier) USS Abraham Lincoln pawh a tel a ni.
US-in Iran hnaiah sipai a tirh hi Iranian venhim hna thawktuten an rama mipui lungawi lote laka tharum a hman hnu lawk niin thil thleng hmutute chuan khatiang taka mipuiin beih let an tawh kha a thleng ngai lo niin an sawi hial.
Iranian thuneitute chuan lungawi loh lantir lai khan mi 3,117 thah an nih thu an sawi a; mahse, mihring dikna chanvo humhalhtu pawl leh thil thleng viltute chuan a aia tam daih niin an sawi thung.
US-a Human Rights Activists News Agency (HRANA) chuan lungawi loh lantirtu mi 6,430, naupang 152 leh sorkar nena inkungkaihna nei mi 214 an thi niin an sawi a. Thi nia sawi dang 11,280 chu an chhui chiang mek bawk tih an sawi.
Norway-a Iran Human Rights (IHR) phei chuan thi hi mi 25,000 an tling niin an sawi thung.
Iranian mipuiin lungawi lohna an lantir kha an ram eibar dinhmun hniam lutuk vang a ni a, a hnu zelah erawh an ram rorelna kalhmang thlak duhna a tel zui ta a ni.