Dhaka court-in tang turin Hasina-i leh UK MP Siddiq-i hrem

Bangladesh court chuan ram danga tlanchhe mek an prime minister hlui, Sheikh Hasina-i leh a laizawn fanu, UK MP Tulip Siddiq-i te chu ei ruk thubuaiah lung in tang turin a hrem.
Dhaka-a court hian Thawhtanni khan Hasina-i hi amah leh a chhungten dik lo taka an khawpui bula sorkar ram an neih theih nana hma a lakna avangin kum 10 tang turin an ti a ni.
Hasina-i hi kum 2024-a zirlaite kaihhruaia a sorkar duh lohna lantirnaa paih thlak a nih hnuah India-ah a tlanchhe mek a, mipuite hian kum 15 ro a relna chu an tihtawpsak a ni.
Amah awm lo mah se mipuiin lungawi lohna an lantirna bei leta mihring laka tih dan phung lo taka a chetna avangin thi turin hrem a lo ni tawh bawk a. UN chuan zirlai kaihhruaia a sorkar duh lohna lantirnaah khan mi 1,400 vel thi an awm niin an sawi.
Special Judge Court-4-a roreltu, Judge Mohammed Rabiul Alam-a chuan UK-a rorel lai, Labour Party MP ni mek, Siddiq-i pawh dik lo taka sorkar ram a neih avangin kum lo tang turin a hrem bawk.
Siddiq-i unaute pahnih, Azmina leh Radwan Mujib te pawh he thubuaiah tho hian kum sarih ve ve tang tura tih an ni bawk.
Bangladesh sipaite chuan London police-te chu ‘an mi man duh, Siddiq-i leh a chhungte chu mana a rang thei ang bera Bangladesh Law Enforcement agency-te hnenah hlan turin’ an hriattir tawh.
Hasina-i leh Siddiq-i hi he thubuaiah tho hian thiam loh chantir an lo ni tawh a, an pahnih hian an chunga thuremna chu a dik lo tih an sawi ve ve.
Thu remnaah chuan Siddiq-i hian a nu, Hasina-i laizawn, Sheikh Rehana-i chu amah leh a unaute pahnih tan Dhaka-a sorkar hmunhma an neih theih nana hmala tura hrilh tura hmintu niin a tar lang.
Hasina-i hi a hma khan sorkar ram neih chungchangah tho hian kum 15 ro a rel chhung khan thubuai paliah thiam loh chantir a lo ni tawh a, thuneihna hmang dik lova puh a ni.
Heng thubuaiah hian a vaiin kum 26 chhung tang tura tih a ni a, a fate pahnih, Sajeeb Wazed leh Saima Wazed te pawh kum nga ve ve tang tura tih an ni a. Siddiq-i nu, Rehana-i leh Azmina leh Radwan te chu kum sarih ve ve tang turin tih an ni bawk.
Tun tuma Hasina-i leh a chhungte chunga hremna hi Nobel Peace Prize lo dawng tawh, Muhammad Yunus-a kaihhruai sorkar lailawk ding mekin February 12-a inthlanpui nei tura inbuatsaihna a kalpui lai mek a ni.
Hasina-i kaihhruai Awami League party erawh he inthlanah hian chuh thei lo tura tih an ni.