Khawvela rul sei ber

Maros, Indonesia-a 2025 kum tawp lama an saphai man chu Guinness World Records-in khawvela rul khawi ni lo (wild) zinga chhinchhiah theih china sei berah a puang. He rul hi reticulated python (Malayopython reticulatus) niin, January ni 18 khan a hmui atanga a mei hmawr thlengin uluk taka an teh hnuah meter 7.22 (feet 23 leh inches 8) a sei a ni tih Guinness World Records-in a pawm ta a ni.
He rul hi an kapmuhil hmasa phawt a, a taksa a zawi vek hnua an teh a ni a, hetianga an taksa a zawi vek lai hian an harh van lai aiin 10% velin an sei zawk thin a, chuvangin he saphai pawh hi a harh that lai cuan meter 7.9 (feet 26) vel a sei a ni ang. Mahse, Guinness lam hian risk awm thei hrang hrang ngaihtuahin, rul sei zawng teh tur chuan chiu muthilh phawt tur an ti a ni.
He saphai an man thar hi Indonesia-a conservationist Budi Purwanto-a’n a enkawl mek a, wildlife guide leh rescuer, rul han buaipui vel tura license nei thlap Diaz Nugraha leh natural-history photographer Radu Frentiu ten a sei hi a teh a ni.
He saphai hi a sei zawng an teh bakah a rih zawng pawh an bûk nghal a, pound 213 (kg 96.5) a rit a ni bawk. Hetihrual hian saphai hi a chawei puar loh lai a ni a, a chaweina a rei deuh hlek tawh a, a puar lai chuan kg 100 chuang a rit ni ngei tura ngaih a ni.
He saphai hmingah hian “Ibu Baron” (The Baroness) an ti a, tunah chuan Sulawesi a snake sanctuary-ah an dah tawh a ni. Reticulated python te hi a nawlpuia a lak pawha khawvela rul sei ber te zinga mi an ni a, dan naranain meter 3 leh meter 6 (feet 9 leh inches 1- – feet 19 leh inches) vela sei an ni tlangpui a, meter 6 aia sei pawh hi hmuh tur an awm zeuh zeuh. Tuna an saphai man thar Ibu Baron hi a nu (female) a ni.
Chhinchhiah theih china a hmaa rul sei bera puan pawh reticulated python tho niin, East Kalimantan, Borneo-a August 1999 a an teh niin, meter 6.95 (feet 22 leh inches 10) a sei a ni. Rul sei tak tak sawi a awm zauh zauh a, 2016-a Penang Malaysia-a retic python lian an hmuh chu meter 7.5-7.9 (feet 24 leh inches 7 atanga feet 26) vel a sei niin an sawi a, a video leh thlalak te pawh a awm nain, he saphai hi a sei zawng pawmawm taka tehna chhinchhiah a awm tlat lo a, an man hnu lawkah a thi zui ta mai bawk si a ni.
Rul ramtla chauh ni lo, a khawi a khawi len pawh chhiar chuan khawvela rul sei bera an chhinchhiah chu reticulated python tho a ni a, a hminga Medusa an ti a, Kansas City, Missouri, USA-ah October ni 12, 2011 khan an tehin meter 7.67 (feet 25 leh inches 2) a sei a ni.