Canada khawthlang kilkhawra inpawng kahnaa mi pakua thi
Canadian police an ram khawthlanga lam British Columbia province-a mi chenna kilkhawr tak, Tumbler Ridge-a sikul leh ina inpawng kahnaah mi pariat an thi tih an sawi.
Mi 25 dangin hliam an tuar a, a titu nia hriat, kum 18 mi, Jesse Van Rootselaar-a ruang pawh a hmunah hian hmuh a ni a. Sikul chhungah amah inkap hlum ni ngeia hriatin a ruang hmuh a ni.
Tumbler Ridge Secondary School-ah hian mi paruk thiin mi 25-in hliam an tuar a. A bula inah mi pahnih, nu kum 39 leh a pasal nau mipa kum 11 mi thia chhar an ni bawk.
Thuneitute chuan a titua an puh, Van Rootselaar-a hi mipaa piang, hmeichhia anga chhinchhiah a ni a. Kum li kal ta khan Tumbler Ridge Secondary School atang hian zir zo lova chhuak a ni.
“Jesse-a hi mipaa puang, kum ruk kal ta vela hmeichhiaa inthlak a ni tih chauh ka la sawi thei,” tiin Royal Canadian Mounted Police (RCMP) deputy commissioner Dwayne McDonald-a chuan a sawi.
Inkahna hi sikul bul inah hian a thleng hmasa a, sikul hi a pan zui ta niin McDonald-a hian a sawi bawk.
Sikula thite hi kum 39 mi hmeichhe educator, zirlai hmeichhe pathum, kum 12 mi vek leh mipa zirlai pahnih, kum 12 leh 13 an ni.
Thuneitute chuan mi dang inrawlh an awm ve an rin loh thu leh engvanga hetianga bei nge a nih an la hre lo.
RCMP chuan Tumbler Ridge Secondary School-ah hian silai nena che an awm tih hi Thawhlehni chhun dar 01:20 (India-a Nilaini zing dar 01:50) thu an dawng.
Police hian officer an tir nghal a, inkahna a thleng tih sawina leh a chhehvelah silai nena che an awm tih an hriattir nghal bawk a. “Hmun himah awm ula, inkalhkhum ula, in in leh in sumdawnna hmun chhuahsan suh u,” tiin tual chhung mite an hriattir.
Tumbler Ridge Secondary School leh a bula Tumbler Ridge Elementary School chu kharkhipa hual a ni.
British Columbia-a Public Safety Minister leh Solicitor General Nina Krieger chuan police officer-te hi minite hnih chhungin Tumbler Ridge Secondary School hian thleng niin a sawi.
Tumbler Ridge hi mi 2,400 chuang chenna niin secondary school-ah hian Grade 7-12 zirlai 160 vel an awm.
RCMP chuan, “Mi 25 vel dinhmun en chian an ni a, tual chhung damdawi inah nunna atana hlauhawm khawp hliam ni lote chu enkawl an ni,” an ti.
RCMP chuan police-in kut tuar dang an awm em tih an dap nghal tih a sawi a, “Officer-ten in leh hmun dang dapin hliam leh kut tuar dang an awm em tih andap a ni,” a ti.
RCMP North District Commander Chief Supt Ken Floyd chuan an rinhlelh hi a hma pawhin mi chengte hnenah lo ngaihven tura an tih tawh a ni tih thuthar lakhawmtute a hrilh a. ‘Hmeichhia anga sam uk’ tia sawi niin mipa nge hmeichhia tih leh a hming erawh hetih lai hian an puang lo thung.
Tumbler Ridge Mayor Darryl Krakowka chuan CBC hnenah an khua chu an tlem a, thite pawh an hriat vek a nih a rin thu a sawi a. Town Councillor Chris Norbury pawhin BBC Radio 4-a Today hnenah thil thleng chuan a barakhaih hle tih a sawi.
Canadian Prime Minister Mark Carney-a chuan Germany a zin tur thulh nghalin ‘hun khirh tak’ an tawk tih a sawi a, khaw mite chu an lamah ram pum an tang tlat tih a sawi bawk.
Tumbler Ridge hi Vancouver hmarchhak km 670-a hlaa awm niin khaw kilkhawr tak a ni a. Lungalhthei laih chhuahna khur awmna niin hei vanga hriat hlawh hi a ni a, dinosaur fossil hmuh chhuahna hmun a nih bawk avangin khualzinte pawhin a en turin an tlawh tam hmun tak a ni bawk.