Thai sikula silai nena sikul luhchilhtu man

Thailand police chuan silai nena sikul luhchilha silai hmet puaktu, mi pahnih hliamtu chu manin building a thunun pawh an chhuhsak.
A titu nia an rinhlelh hi kum 18 mi niin Hat Yai khawpui bula Phatong Prathan Keeriwat School hi Nilaini tlai dar 05:00 (India-a tlai dar 03:30) hma hreta luhchilhin silai a hmet puak tih thuneituten an sawi.
Mi pahnihin he thil thlengah hian hliam an tuar.
Sikul principal chu silai vanga hliam tuar pakhat zawk niin damdawi inah lak a ni tih thuneituten an sawi a. Thawktu hmeichhia pakhat kah a ni bawk tih public health ministry chuan a sawi a, zirlai pakhat chu a hlau tukverh atangin a zuang chhuak bawk.
Sikul chhungah hian zirlai leh zirtirtu thahnem tak tangin police unit-ten an hual a. Darkar hnih hnuah a titu nia an hriat hi inpein an man zui a. An lak bo hnuah ambulance-te an thleng zui a ni.
Hetianga a tih chhan hi hriat a la ni rih lo va, tual chhung chanchinbute chuan sikula zirtirtu nen intihthinrimna an nei niin an tar lang hlawm thung.
Thailand-ah hian silai kaihhnawiha pawikhawihna hi a thleng tam angreng hle a, silai erawh dan leh dan lo pawhin kawl an tam hle.
Tun hnai maiah pawh thihna thlen tamna ang chi a thleng fo va. Nikum khan Bangkok-a ei tur zawrhna hmunah mi panga kah hlum an ni.
Kum 2023 khan mipa naupang kum 14 miin Bangkok lailia bazarna hmun changkangah mi pahnih thatin mi dang panga a kap hliam bawk.
A hma kumah chiah police officer thinin mi 36 a that bawk a, heng mite zinga a tam zawk hi naupang, Thailand hmarchhaka kindergarten-a lutte an ni a, an rama inpawng kahna rapthlak ber pakhat a tling.