Indona nasa tak karah US hovin Ukraine-Russia inbia

Indona nasa tak karah US hovin Ukraine-Russia inbia
Moscow-in Ukraine a rûn tan champha kum lina a thlen dawn mek laiin Russian leh Ukrainian palaite chu US ruahmanna angin Geneva-ah an inbe leh tan.
Moscow-in Ukrainian ram chan a duh chin a la tihtlem chuan loh avangin thil tha tak an sawi chhuah beiseina erawh a tlem hle.
Hetih lai hian tui khang theihna khawp hiala a vawh laiin Russia hian Ukraine chu zan lamah a bei chhunzawm zel bawk.
Switzerland-a palaite an thutkhawm tan hnu lawkah Moscow hian van sang atangin Ukraine-a region 12 chu drone 400 leh missele 30 dawn hmangin a kap a, mi pathum vel an thi.
Ukrainian Foreign Minister Andrii Sybiha chuan an beih chhunzawm zel hian ‘Russia hian muanna a awmna tura hmalakna engah mah a ngaih lohzia a lantir’ niin a sawi.
Russia pawhin an air defence hmangin drone 150 chuang an kap thla a, Unkrainian drone-in tuialhthei thlitfimna a fuh avangin a kang bawk niin a sawi.
Thawhlehnia inbiaknaah hian US aiawhin Donald Trump-a special envoy Steve Witkoff-a leh president makpa, Jared Kushner te an tel.
Ukraine aiawh hian National Security Council Secretary Rustem Umerov leh President Volodymyr Zelensky-a chief of staff, Kyrylo Budanov an tel.
Russian palaite zingah hian President Vladimir Putin-a thawhpui, Vladimir Medinsky-a leh sipai hnuchhui pawla mi langsarte an tel thung.
“Vawiin hian eng thuthar mah kan hriat ka beisei lo,” tiin Kremlin thupuangtu, Dmitry Peskov-a chuan a sawi a, Nilainiah an inbiak chhunzawm dawn tih a sawi.
Air Force One-aa chuan laiin Trump-a chuan Thawhlehni khan Ukraine chuan ‘dawhkana chhawp tur tha zawk an nei’ niin a sawi bawk.
Trump-a hi a hma khan kum li chhung indona titawp tura hma a laknain awmzia a awm thei lo chu a thin pawh a rim hman hle.
Russia hian khawchhak lama Donbas region zau tak telin Ukraine ram 20% vel an luah mek a. Kremlin chuan Kyiv hian region pum hi pe se an duh a, lehlamin an phal lo.
Kyiv hian inremna siam hmain US telin, khawthlang ramten an himna tur tawk an tiam ngei a phut bawk.
Ukrainian Deputy Energy Minister Artem Nekrasov-a chuan Thawhtanni zana beihna an tawhah ramri hrul, Slovyansk khawpuiah energy hmuna thawk mi pathum an thi tih a sawi.
Naupang telin mi pakuain hliam an tuar bawk niin President Zelensky-a’n a sawi bawk a. Chenna 10 chuang leh relkawng a chhia tih a sawi bawk.
Kyiv hian region 12 beih a nih thu leh hmunhma a chhe nasa a, chhim lam lawngchawlhna, Odessa khawpuia mi sang telin power an neih loh phah.
Ukraine hian thlasik khaw vawt vin tak tuar mekin hetih lai hian Russian-te hian an power hmunte an tihchhiatsak nasa a, power leh intihlumna an neih loh phah nasa hle.
Russia hi zankhuain an bei ve bawk a. Chhim lam Krasnodar region-a Ilsky tuialhthei thlitfimna chu drone-in a fuh vangin a kang a, tuialhthei chhekte pawh a kang.
Ramria Belgorod region pawh Ukraine-in drone-a beiin power hmunhma a tihchhiatsak nasa hle.
Tun tuma inbiak hi February, 2022-a Russia-in Ukraine a rûn hnua a vawi khat nana thla hmasaa Abu Dhabi-a Russia, Ukraine leh US an inbiak chhunzawmna kha a ni.
Inremna engmah siam lo mah se rei tak an chawlhsan tawh, mi tang inthleng tawn erawh a hnuah an ti zui a ni.