SUSTAINABLE, INTEGRATED FARMING IN MIZORAM – 8

RK Dawla
Mb 9366095658

1. February thla laihawl a ni a. Nipui a thaw tan a, thilto an chawrno tan a. Boruak nawm hun lai tak a ni a, khawvawt leh khaw lum uchuak inrina laihawlah kan awm mêk a. A hmanhmawh zuate chuan lo an hâl tan bawk a. Nipui thlai (kharif crops) chi hrang hrang chin a hun tan a. Sehfa leh hnim tawm tam hma a ni a, lui kal leh ramhnuai chêt a nawm hunlai tak a ni bawk. Tin, thlai zar kolom (air layering) leh chhawk kawlh (pruning) hun ni mêk bawk.
2. Thlai tang vih-nun leh kolom hi February thla chhunga zawh fel ngei hi a tha a. Kolom nân hian lei kan hmang tlangpui a, meihawl dip or peatmoss or cocopeat 5-10% leh topsoil chawhpawlh hi a tha tâwk viau a. Tin, thlai tang vitnung tur emaw kolom tur pawh nise, a zik ziding, a zar zawng zawnga a sâng lai ber zel kha a tha a. A chhan chu hengho hian chaw leh tui an la chak bik a, a zar darhho ai chuan. Tin, kolomna or vitnung tura kan chhawkna hnuaiah khan a rawn chawr pêng darh leh thin a, hei tak hi thlai ria sâng lutuk vêng tura tih-buk nân a tangkai thin. Khaw eng hmu tha lo leh hmun chêp (thlai dang kara phun) phei chu an ria duh êm êm. A kung tibuk turin a vela thito dang, khaweng hliahtu paih thensak tel a tul bawk. Tin, bud/kolom/a tang vih-nunte hi kum 2 tal chu rah chhuahtir loh tur a ni. Leiung kaldan phung pangngai kal pêlin a tang or pêng tihpun an ni a. Zung an chhuah that hmasak leh kung an sawhngheh hmasak kha a tul ve thin. Kan rahtir chuan, a chakna neihchhun kha rah chawm nan a hmang nasa a, zung, kung leh zar siam nân chakna khamkhawp a hnu lova, a sawngnawi zui duh êm êm.
3. Thingthupui hi thlai thang muang ang reng tak a ni a. A chi kui tiah kan phun tlangpui avângin, kung lian thuai thuai chi a ni chiah lo deuh a. Kung khata tihtham deuh chawr tur chuan hun a duhrei thin a. Dan tlangpuiin hmun dàm deuh leh lei thawlêng deuhah thingthupui a thang chak thin. Lei sakhat deuh a nih chuan, leihâng (organic matter) tamna a ngai thung, thang chak tur chuan. Tin, thingthupui hi 3ft an tlin veleh thal laiin kawih-kûr tur a ni. A zîk kha dîm takin alphabet U letling ang hian kan kuai kur a, a zik lam hnah kau paihin, a lêr kha a kung bul leia hmawlh or thingtuai khen ngheh takah tawn beh tlat tur a ni. Tichuan, a zâng kûl atang chuan, chawrno tam tak a rawn chhuah a, a buk a hniam phah a, a than chak phah thin. Chutia nih lova a kung chhawk ringawt chuan, a chawrpêng a tam mawh êm êm thin, February thla (thil chhawk bulh hun)-ah pawh. Tin, kawih kur hi sût leh tawh loh tur a ni a, a zar pênga chawrte khan a kungpui aiawhin than an pe darh ang a, kawih kur hmaa a kungpui zik lam kha chu a ral vek tur a ni.
4. Tin, huan nghet siam tur reng rengin, hmun zawl a nih loh chuan, tun ang hun atang hian leilung luangral venna tur ENGEMAW tal siam ngei ngei tur a ni. Contour trench emaw terrace chhangkhât tak emaw changkham tal pawh siam hrâm tur a ni. Kan Mizoram awihpang zawng zawng hi, a nihna ang taka thlai phun hnan a, daihrei thei tur a awm lo. Kan sik leh sa hian a zir lova, thla ruk thal char char, thla ruk dang ruahsur leh chawrh chawrh a ni a. Lei kalral vanga lei dâ hi Mizoram huan kumhlun nei zawng zawngte harsatna intawm a ni e. Tin, thlai puitling tawh emaw phun tawhna bikah pawh, leilung kalral dang tura khur laih thluah hi a thawk tha khawp tih kan finfiah tawh bawk e.