MSL 11 – MSL vawi 6 champion Zarkawt BCA King of Mizoram Super League (MSL)
MSL 11 – MSL vawi 6 champion Zarkawt BCA
King of Mizoram Super League (MSL)
Infiamna tukverhah dakin, khawvel huapin han thlir ila sawi mai theih nghal tur an khelhna league awptu pathum han thurchhuak ila – France rama an football league sang bera roreltu Paris St. Germain FC hian hun rei tak chhung champion nomawi nen an awp thei a; NBA lam hawi leh ila, Chicago Bulls in kum 1990 leh kum 1998 inkar chho khan Michael Jordan hovin tuma chuhbuai phak lovin tum 6 zet an champion bawk; India hmarchhaka hnam huaisen zet Zofate kutin kum 1930 bawr khan basketball a tawk tan a, he Zopa kut hian India rama basketball league ropui ber Mizoram Super League (MSL) a duan chhuah hnua Club ropui ber chu Zarkawt BCA a ni a, he club hi kum 2010 khan Zarkawt pa taima tia hriat hlawh Pu Biakchunga (L) hriatreng nana din a ni a, elpui chakawm ber team leh khelhna atana thlanawm ber team an ni mek – MSL Season 10 khelh tawhah tum 6 champion hek le!
Zarkawt BCA lal ram chu!
He club chanchin hi thuang hnihin a sawi theih. Pu Biakchunga (L) fa u ber Malsawmtluanga hovin din a ni; club a insawhngheh theihna turin BCA club hian mihring pakhat, lang lo lama he team thlungkhawm thintu a nei – Lalfakawmi (Faki) a ni.
Ani hi vawiina Zarkawt BCA in ‘King of Mizoram Super League’ a nih theihna tura BCA chhungkaw aiawha team tan rawn penchhuak a ni a, a ho hian MSL 11 champion nomawi hi chawi nawn leh thei tak maw?
Big 4 club zinga 3 te lehthal chak rawn an ni tih hi tualchhung basketball vir vel thlir pha chin chuan an hrethiam vek ang!
Zarkawt BCA hian tualchhung player zinga mamawhna hmun apianga khel thei (utility player) Bungkawn tlangval Lalnunpuia Renthlei (R-a), MSL 9 a MVP kawltu an nei a; MSL X final game 3 a jersey no ZERO ha a HERO a nihpui hma pawha Mizorama hun engemaw chen point guard tha ber Zonunsanga (Zonuna), MSL X a MVP khelhna an la ni cheu.
Matthew Remtluanga Sailo an captain hi foreigner leh inter state player-te aia nep bik lo a la ni bawk mawle – he tualchhung basketball super star 3 hian Zarkawt BCA in MSL lal ram (kingdom) an hum zui theihna turin tualchhung star player langsar vut lo, Khatla South tlangval Hmachhuana khelhpui tur an la nei zui mawle!
Mizo basketballer piang tawh zinga tluktu awm lo leh tha bera chhal ngam (goat) Lalrina Renthlei erawhin ram rorelna dawhkan kil tumin a hmanhlel ta deuh a, tun tum MSL 11 ah hian a inlan dawn lo! Zarkawt BCA head coach K. Vanlaruata tan hian channa satlliah a ni lo tih hi zawh kher a ngai awm lo ve!
Hoops Mania Timeout
Zarkawt BCA head coach ngawichawi zet, K. Vanlalruata chuan, “MSL 11 hi Zarkawt BCA tana head coach anga ka inlanna hmasa ber tur a ni a, chona phurawm leh chhinchhiah tlak tak ka tan chuan a ni dawn.
“Player ang chuan tualchhung club hrang hrangah te ka lo khel ve tawh thin. Khatla TBL, Tuikual South BC leh Chawnpui VR4 ah te ka lo khel ve tawh; Mizoram aiawhin Nationals Sub Junior-ah te inlan ve tawh bawkin, Pathian khawngaihna zarah Gold medal leh Silver medal-te ka lo awrh ve tawh hial; mahse, MSL 11 erawh hi chu tawn ngai loh leh dai thar tur a ni a, eng chiah nge ni dawn tih hi hunin a hril ang chu!
“Kan inbuatsaihna a tha a, ka player-te enkawl an nuam bawk nen – theihtawp kan rawn chhuah ang” tiin The Aizawl Post Hoops Mania-in kan zawhna min chhang.
Team list
Matthew Remtluanga Sailo (Captain)- Zarkawt
Lalsangkima – Zarkawt
Zonunsanga – Zemabawk
Lalnunpuia Renthlei – Bungkawn
Benjamin Zothansiama – Kulikawn
B. Malsawmkima – Ramthar
H. Lalhmachhuana – Khatla South
Samuel Lalramnghaka – Zotlang
Lalhmingsanga – Chawnpui
Lalfakzuala – Tuikual South
R. Lalchhanchhuaha (Dodo-a) – Tuikual South
Chawngdingluaia – Bawngkawn