Zuangtui an champion

Zirtawp zan khan AMC Mayor’s Cup, Futsal Tournamnet 2026 final chu R Dengthuama Hall-ah khelh a ni a, Zuangtui Local Council team te chuan an khingpui Tuikual North Local Council team te chu 5-2 in an hneh a, an champion.
Final-ah hian Tuikual North in bul an tan tha a, an khingpuite nawrin ball chang tam zawk an ni reng. Ball chang tlem zawk ni bawk mah se Zuangtui nawr let a hlauhawm thei hle a, goal thun hmasa zawkah an tang ta nghe nghe. fuh taka an khingpuite an nawr tang hnuin Ricky Lallawmawma chuan minute 9-naah tha zetin a pet goal a, hmahruaina goal a thun.
Si an phurh hnuin Tuikual North in an si phurh sut ngei tumin tan an khawh a, an hun tha nei an chhawr tangkai thei lo. Zuangtui lamin fuh takin an nawr tlang zui leh a, Marcus Malsawmzuala chuan minute 16-naah an goal hnihna a thun a, an hmahruaina a tizau. An goal hnihna an thun hnu lawkah Zuangtui lam an chesual a, hand ball vangin penalty an chawi, penalty hi Tuikual captain Lalnundika chuan minute 18-naah awlsam takin a pet goal a, an si phurh a sut then.
Chawlhlawk hnu lamah inkhel a hmuhnawm viau a, Amos Zorinsanga chuan minute 24-naah Tuikual tan goal thunin an si phurh a sut zo. 2-2 a nih hnuin inkhel a hmuhnawm viau naa Zuangtui lam chan a ni ta thung a, goal thum ngawt an thun belh. Game nghet tha tak Zuangtui tan hian Marcus Malsawmzuala chuan second penalty atangin hma an hruai nawn lehna goal a thun. Hma an hruai nawn leh hnuin an khel tha zui viau a, Ricky Lallawmawma leh C Lalrinzuala ten goal khat ve ve an thun belh leh a, phu takin an champion zui ta a ni.
AMC Mayor’s Cup, Futsal Tournamnet 2026 khelh zawh takah hian Zuangtui LC player pawimawh Ricky Lallawmawma chu Best Player-ah thlan a ni a. Zuangtui tana goal thun thei tak Marcus Malsawmzuala chuan top-scorer a ni bawk.