Modi-a’n UAE president bia, Iran-in a beihna dem

On Mar 3, 2026 0 0

Modi-a’n UAE president bia,
Iran-in a beihna dem
Prime Minister Narendra Modi-a chuan Pathianni zan khan UAE President Sheikh Mohamed bin Zayed Al Nahyan a bia a, Iran-in US leh Israel tangrual beihna a tawh chhan let nana Gulf rama beihpui a thlak chu a sawisel.
Gulf rama cheng Indian-te enkawltu UAE president chungah lawmthu a hrilh a, New Delhi chuan boruak tihdaih, heng lai vela muanna, nghehna leh inremna a awm theih nana beihna a thlawp thu a sawi bawk.
“UAE president, ka unaupa Sheikh Mohamed bin Zayed Al Nahyan nen kan inbia a, UAE beihna hi na takin ka dem a, heng beihnaa nunna chân an awm hi ka pawi a ti hle a, India chu heng hun harsa takah hian UAE nen hian inlungrual takin a ding a ni,” tiin X-ah a tar lang.
Modi chuan, “UAE-in a rama awm India-te a enkawlna avangin lawmthu ka sawi a, boruak tihdaih, heng lai vela muanna, nghehna leh inremna a awm theih chu kan thlawp a ni,” a ti.
Inrinni tuk atanga Gulf ram puma Iran-in US leh Israel tangrual beihna an tawh chhan let nana beihpui a thlaknaah mi pathum an thi a, mi 58 an hliam a, heng zingah hian India mi pakhat pawh a tel a. Tunah erawh chuan hlauhawmna hmun atangin a chhuak tawh niin thuneitute chuan Pathianni khan an sawi.
UAE-a Indian Embassy chuan social media-ah India mi pakhatin hliam a tuar tih an hriat thu leh damdawi in thuneitute nena an inbiak thu an tar lang ve bawk.
UAE defence ministry chuan Iran-in a kahna ballistic missile 165 an lo dangchet tih a sawi a, heng zinga 152 chu a chhia a, 13 chu tuipuiah an tla bawk.
Ministry chuan cruise missile pahnih leh Iranian drone 541 an tum fuh lo tura an lo dan thu leh heng zingah hi 506 kah thlak a nih thu a sawi bawk.
Iran-a Supreme Leader Ayatollah Ali Khamenei chu Inrinni tuk khan Tehran-ah US leh Israel thlawhtheihnaten beihpui an thlaknaah a thi a. Iran sorkar chanchinbu pawhin Pathianni khan a nemnghet.
Hemi hnu hian Iran hian a hruaitu lu ber thah a nih chhan letna atan Israel leh he biala Arab ram eng emaw zata US hmunpuite chu missile hmangin a kap zui ve nghal a ni.