Zirtawpniah Modi-a leh Putin-a inkawm dawn

Zirtawpniah Modi-a leh
Putin-a inkawm dawn
Prime Minister Narendra Modi-a leh Russian President Vladimir Putin-a chu New Delhi-a BRICS Summit 2026-ah Zirtawpni hian an inkawm dawn niin Kremlin thupuangtu, Dmitry Peskov-a’n a sawi.
Moscow atanga Thawhlehnia ral atanga thuthar lakhawmtute a kawmnaah Peskov-a chuan, “President hian a zin chhungin prime minister nen an inhmuh leh kan beisei a, ruahman fel tawh a ni a. Zirtawpni hi tihfel niin an inkawm thin ang bawkin an inkar thilte an sawi ang,” a ti.
18th BRICS Summit hi Bharat Mandapam, New Delhi-ah September 12 leh 13 hian neih tur a ni a. India hian BRICS president nihna hi January 1 atang khan chelh tanin a vawi li kaihhruaina a ni.
Peskov-a chuan hruaitu pahnihte inbiakna turah hian India hnena Su-57 thlawhna hralhna tur chu an sawi tur langsar a ni tih a sawi a, sumdawnna leh eibar thil pawh an sawi dawn niin a sawi a. India erawh chuan Peskov-a thil sawi hi engmah sawi chian a la nei lo.
US-in Russian tuialhthei leisaktu ramte lakah chhiah 100%-a sang laksak a vauna chu Kremlin thupuangtu hian ‘dan lo leh pawm theih loh’ tiin a sawi.
Pragati Maidan-a Bharat Mandapam-a ni hnih chhung intawh khawm turah hian BRICS member ramte, sawm bik leh mi pawimawh tak tak an tel dawn.
Member 11 – Brazil, China, Egypt, Ethiopia, India, Indonesia, Iran, Russia, Saudi Arabia, South Africa leh United Arab Emirates an ni sa a. Indonesia hi nikum atanga full member ni ve tan a ni.
BRICS hian thawhpui ram 10 – Belarus, Bolivia, Cuba, Kazakhstan, Malaysia, Nigeria, Thailand, Uganda, Uzbekistan leh Vietnam a nei a. Hengte hi full member nen an inang chiah lo.
Summit hi Modi-a’n a kaihruai dawn a. Putin-a chuan a tel tur thu a tichiang tawh a, Chinese President Xi Jinping-a pawh a tel beisei a ni a. Xi-a hian India a tlawh a nih chuan kum 2019-a Mamallapuram-a an inhmuh hnua Modi-a nen an inhmuh lehna hmasa ber tur a ni ang.
Hruaitu dang tel tur zingah South African President Cyril Ramaphosa, Egyptian President Abdel Fattah el-Sisi, Indonesian President Prabowo Subianto, Iranian President Masoud Pezeshkian, Ethiopian Prime Minister Abiy Ahmed, Belarusian President Alexander Lukashenko, Kazakh President Kassym-Jomart Tokayev, Malaysian Prime Minister Anwar Ibrahim leh Thai Prime Minister Anutin Charnvirakul te an tel a. UN Secretary-General António Guterres-a pawh a tel beisei a ni bawk.
Prime Minister Modi-a leh Putin-a hi tun hnai lawk khan Bishkek, Kyrgyzstan-a Shanghai Cooperation Organisation (SCO) Summit-ah an inhmu tawh a. Nikum December thlaa New Delhi-a India-Russia Summit hnua an inhmuhna hmasa ber a ni.