Netanyahu-a’n Iran indonain kum tam a daih ring lo

Netanyahu-a’n Iran indonain kum tam a daih ring lo
Israel Prime Minister Benjamin Netanyahu-a chuan Iran laka indona chu kum tam tak a ngaih a rin loh thu a sawi a, hetih lai hian Israel chuan Lebanon-a Iran thlawp Hezbollah a beih bakah Iran-in US hmunhma awmna Gulf ramte a kah avangin buaina hi a zau zel.
US President Donald Trump-a chuan a tirah indona hian kar li atanga kar nga chhung a awh tur thu a lo sawi tawh a; mahse, a hnuah Iran laka indona lian tak kalpui a ni tih a sawi leh.
Netanyahu-a hian tun hnaia heng lai vela indona an kalpui anga kum tam daih ang indona a nih loh a beisei thu a sawi a ni.
Fox News-a ‘Hannity’ programme-ah Thawhtanni khan Netanyahu-a chuan, “Rang leh thutlukna tawp siam theihna a ni a. Hun eng emaw chen a la ngai thei a; mahse, kum tam tak a ngai dawn lo. Indona tawp nei lo a ni lo,” a ti.
Thawhlehni kha indona tan atanga ni lina a ni ta a, Tel Aviv khawpuia in chhawng sangte chu thil puakin a nghawr dur dur reng a, air defense hmangin Iranian missile an lo dang bawk.
Israel hian Tehran-a Iran sorkar broadcaster IRIB awmna complex chu a bei a, Lebanon puma khawpui hrang hrangah Hezbollah firfiakte a bei bawk.
Thawhlehni khaw var hma khan drone pahnih, Iran atanga kah nia hriat chuan Riyadh-a US embassy chu fuh a, chhiatna tenau a thlen bakah kangmei a chhuak a, an tum an fuh hmain drone pariat vel an dang leh niin Saudi Arabian defence ministry chuan a sawi bawk.
US leh Israel tang dun hian thlawhna hmangin Inrinni atang khan Tehran laka beihpui thlak hi an tan a, Iranian Supreme Leader Ali Khamenei-a pawh an that tawh a. Iran leh a thawhpui, Hezbollah-te chuan phuba lak nan Gulf ram zau zawk chu buainaah hnuk lutin Iran, Israel, Lebanon leh ram dangah civil mi za tam tak an thi tawh.
Islamic Revolutionary Guard Corps (IRGC) chuan Thawhlehni khan an tuipui sipaiten Bahrain-a US airbase-a main command building leh headquarters chu ‘Operation Promise of the Truth 4’ thawh 14-na tia an sawi hmangin an tichhia tih an sawi.
IRGC chuan thuchhuah siamin Sheikh Isa-a base hi zing hma takah drone leh missile hmangin nasa takin an kap tih a tar lang a, drone 20 leh missile pathumin an tum an kap fuh niin an insawi.
US Secretary of State Marco Rubio-a chuan Thawhtanni khan Iran beihpui thlaknaah ‘US sipaite beihna nasa ber a la thleng lo’ tih a sawi.
Thuthar thehdarhtuten Iran-ah eng chen nge US a inrawlh a rin tih zawhna chhangin Rubio-a chuan a hriat loh thu a sawi a, Trump-a’n Middle East-a indona bei tura US sipaite a dah dawn leh dawn loh a sawi loh thu a sawi bawk.
Rubio-a chuan, “He beihna atana kan thil tum kan siam te, an ballistic missile theihna tihchhiat te, kahchhuah theihna leh thil siam chhuah theihna te pawh hi sipaite tel lo chuan tihhlawhtlin theih kan ring lo,” a ti.
Iran Assembly of Experts member, Supreme Leader thar thlan tura mawhphurtu chuan Khamenei-a thlaktu tur thlan chu hun rei a ni dawn lo niin Iran news agency chuan a tar lang.
US sipaite chuan Iran-a hmun 1,250 chuang an kah tawh thu leh Iran lawng 11 an tihchhiat thu an sawi a. Tun thlengin US service personnel paruk an thi tawh a, heng mite hi kartawpa Iran-in phuba lak nana Kuwait a beiha thi vek an ni.
Kuwait hian Iran beihpui thlaknaah American F-15E fighter jet pathum chu tihsualin a kap thla niin US Central Command chuan a sawi a. Thawktu paruk chu an la chhuak a, an dam vek tih an sawi.
Middle East buaina hian khawvel pum thlawhnaa inkalpawhna a tibuai hle a, khawvela tuialhthei sumdawnna hmun ngaa thena hmun khatin Iran tuipui kam a paltlang, Strait of Hormuz a khar avangin a man a san phah hle.
Gulf-a thlawhna tumhmun lian, international airport lun ber, ni khata thlawhna 1,000 chuang luh leh chhuah, Dubai thleng telin buaina chhuak vang hian ni li khar a ni tawh a. COVID-19 hri leng hnua thlawhnaa veivahnaa harsatna lian ber a thleng.
Khawvel pumah tuialhthei leh boruakalhthei phurhna man a sang zel bawk.
US State Department chuan Bahrain, Iraq leh Jordan atanga rikruma chet chhuah ngai ni lo an sorkar mi leh sate chu chhuahtir turin thupek a chhuah.
Rubio-a’n thuthar thehdarhtute a hrilh danin US-in hma a lak chhan chu a thian tha, Israel-in Iran beih a tum thu a hriat vang leh Tehran-in a chhan let tur thu a hriat vang a ni a, “Hei hian US base-te chu hlauhawmah a siam a ni,” a ti.
Tun thlenga buaina chungchanga vantlang hmaa a thusawi chian berah Trump-a chuan Thawhlehni khan beihna hi ?Tehran-in nuclear program leh ballistic missile program thang chak tak a neih tihtawp tumna a nih thu a sawi.
Iran hian nuclear ralthuam siam a tum lo tih a sawi a, US leh Israel-te beihna chu chhan awm lo a nih thu a sawi a. “Tehran leh Washington-ten nuclear inremna siam tura inbiakna an neih laiin a thleng a ni,” a ti.
Trump-a’n Iran a bei hi kumin midterm inthlanpuia Republican Party tan risk lian tak a ni a, American mi pali zinga pakhat chauhvin an thlawp thu an sawi niin kar tawpa Reuters/Ipsos poll-in a tar lang.
Russia, China leh Turkey te chuan he indona hi an dem hle a ni.