Barcelona-in Atletico Madrid final lut tur dang zo ngang lo!

Barcelona-in Atletico Madrid final lut tur dang zo ngang lo!
Thawhlehni zan Copa del Rey semi-final second leg match-ah Barcelona chuan si thum faiin an mikhual Atletico Madrid sawp bawk mah se first leg-a si li faia an tlawm tawhna tuarin Catalan-ho hian final an lut zo ta chuang lo a, khelh hnih belhkhawma 4-3 hnehna nen Atletico an tlang ta tho tho a ni.
Spotify Camp Nou-a inkhel entu mipui 45,398 hmaah Barca hian ‘comeback’ ropui an lantir teuh ther ther hle a; Marc Bernal chuan darkar chanve khelh tlin dawnah goal hmahruai khungin, first half hun pekbelh penalty atanga Raphinha goal khat chhuihluh nen half time-ah mualneitu team hian si hnih faiin hma an hruai phawt.
Second half-ah pawh champion lai Barcelona hian inkhel thunun zawk lehin, goal erawh an thun nghal mai lo a, minute 72-ah goal hmahruai thawhtu rawlthar kum 18 mi lek Bernal bawkin home team goal thumna a tilut leh a, minute 20 dawn lai hun a la awm avangin Barca fans tan ‘comeback’ beiseina a lian chho hle tura ngaih a ni!
Chuti ang boruakah Catalan team lamin goal an khung belh thei ta mai lo a, hun pangngai tawp dawnah nawr tak tein nawr zui leh bawk mah se an goal lina an sual chhuah zawh ngang loh avangin extra time pawh an thleng zo ta lo a; Diego Simeone-a team-in nizan semi-final second leg match dang Real Sociedad leh Athletic Club inkhela chak zawk zawk final-ah an tum thei dawn ta a ni.
Copa del Rey title tum 32 zet la tling tawh Barcelona hian thla hmasa first leg-a an tlawm chiang lutuk kha an tuar a, an buzawla 3-0 hnehna meuh pawhin a chhan zo ta lo a ni!
Hansi Flick-a team hian season liamta khan he stage-ah vek hian Atleti hi an lo hneh tawh a, mahse, kumin chu a tlawm zawkah an tang ve ta thung a ni.