House-a thusawi nawtreh leh Thu inchuh sawi tawh loh tum

On Mar 6, 2026 10 0

House-a thusawi nawtreh leh
Thu inchuh sawi tawh loh tum
Assembly speaker Lalbiakzama chuan House-a member thusawi chu nawhreh leh a ni tih a sawi a. Assembly Committee pakhat report kaihhnawiha thu inchuh chu House-a sawichhuah tawh lo turin inrem a ni tih a sawi bawk.
Ningania Assembly Session-ah speaker chuan, March 3-a House member Robert Romawia Royte-in House leader, chief minister chu a (kohhran) upatna dahtha a, Sikkim Gangtok-a chevel anga ngaih theih leh zurui buai anga ngaih theih deuhin a sawi, tiin, amah Robert Romawia hian he a thusawi hi House record atanga nawhreh (expunge) a duh thu a sawi angin, nawhreh a ni tih a sawi.
Committee on Petitions-in an report thehluh chungchang House-a sawichhuah thinah speaker chuan inkawmho tura a sawm angin, leader of opposition Lalchhandama Ralte, deputy speaker Lalfamkima, minister Dr Vanlalthlana bakah Committee on Petitions chairman hlui T Lalhlimpuia leh member R Rohmingliana te nen an inkawmkhawm a. Inhriatthiam loh lai an sawi a, tunhnu ah chuan inhriatthiam ngai lai inhrethiam a, inngaihdam ngai inngaidamin, he thil hi House-ah sawichhuah tawh loh nise, tia an remtih tlan thu Lalbiakzama hian a sawi.
“Tun tum hi first timer (MLA vawikhat nihna) kan thahnem khawp a, thil hmangchang hriat loh theih pawh a ni. Kawng tam takah kan inhriatthiam tawn tlan a ngai a. Tute pawhin kan fel loh leh kan tih fuh chiah loh lakah inhrethiam tawn ang u, tiin, tun hnuah sawi ri tawh lo ang u, kan ti a ni,” a ti.
House leader Lalduhoma chuan, Gangtok chungchang hi a sawifiah a. Gangtok-a an kal hi kum 2006 a ni a, Assembly Committee – Public Accounts Committee chairman a nih lai a ni, tiin, heta Committee member kalte chu, pute – R Lalzirliana, Lalrinliana Sailo, D Thangliana leh H Vanlalthaliana bakah Assembly official pahnih an ni a, hlim takin an kal a, thil thleng engemaw awm nise, a hlimchhawnah hian miin an hre nghal hluai ang tih chu thil chiang sa a ni tih a sawi. “Kum 20 liam tawh hnua phuahchawpa thil kan ti hi a pawi ka ti,” a ti.