Sairang ramah India sipai tan ram pe: – Chief minister
Sairang ramah India sipai tan ram pek a ni tih tunhnaiah sawrkarin a hrechhuak a, tihfel ngai tihfel bak tih theih dang an nei tawh lo niin chief minister Lalduhoma chuan a sawi. Zirtawpnia Assembly Session-ah chief minister hian speaker remtihna in House-ah hemi chungchang hi a sawi a. Sairang Village Council huamchhung Chawilung (Kolabari) a mimal engemawzat ram chu Infantry Brigade KLP (Key Location Plan) atan lak (acquire) tumna a awm tih an hriatin, politics-a inbeihna a thlen nawn tawh lohnan leh dan hnuaia dik taka kalpui a nih theihnan hei hi sawi tih a sawi.
Chief minister sawi danin, 2014 July 11 khan Aizawl deputy comissioner chuan adminstrative commandant Station Hqrs. Aizawl lehkha a thawn a, Chawilung ram chu Infantry Brigade hmun atan Mizoram sawrkar pawmpuina in no objection certificate (NOC) a pe tih a hriattir. Sawrkar laipui Ministry of Defence atanga phalna lak a nih hnu ah dan angin land acquisiton hi tih nise, tiin a hrilh a. Mizoram sawrkarin NOC a pekah hian ram zau zawng chu acre 570 niin, politics atanga thlirna, dan lam thlirna leh sakhuana atanga thlirna atangin he ram hi buaina engmah a nei lo tih tarlan a ni.
2014 August 6-ah Sairang Dinthar VCP RC Zoliana leh secretary Lalrinngheta ten ram neitu mi 52-te remtihna certificate chu ram neitute signature nen an thehlut a. 2014 November 28-ah Aizawl DC hian adminstrative commandant hnenah bawk ‘buildability certificate’ thehlutin, he certificate hi PWD EE Building Division-in a certified a ni tih a sawi.
2019 October 7-ah Aizawl DC-in adminstrative commandant hnenah vek hian ram acquire-na atan ‘approval in principle’ pek a nih theihnan document – ram neitu mi 52 hnen atanga NOC, ram zau zawng sketch map, Revenue special secretary-in a pek NOC leh Aizawl DC pek NOC thil tel chu a pe a. NOC-ah hian ramchhung politics, dan atangin leh sakhuana lam atanga thlirnaah a felfai vek tih tarlan a ni tih a sawi a ni. Hei bakah hian Mizoram sawrkarin ram leina rate a siam leh, defence hmun tur a nih avanga forest clearance a ngaih loh thu a thehlut tih a sawi bawk.
Kum 2014 atanga 2021 inkarah he ram lakna atan thil tul tam tak chinfel a ni tih chief minister hian sawiin, “Sawrkar hmasa in kut a lo thlak tawhnaah hian thil fel lo a awm a nih loh chuan, keini tan chhunzawm loh theih loh a ni dawn. Dan anga thlapa kalpui a nih theihnan notification pek chi a nih leh nih loh, SIA (social impact assessment) pek chi a nih leh nih loh, ram chu outright purchase ni loa a hawha hawh (lease) tura duanfel, chuh buaitu dang an awm leh awm loh enfiah chu kan hmabak tur a ni,” a ti.
Sawrkar hmasaten an remtihpuina in Aizawl DC-in hma a la chho ta mai nia a lan thu sawiin, an ni hunah erawh sawrkar angin engmah hriat leh kut thlak an la nei loa, a hnenah pawh official-in thlen a la ni lo tih a sawi a ni.
“Hetiang hi thil awmzia a nih avangin, sawrkar hmasaten an lo kalpui tawhnaah thil fel lo a awm nih chuan zirchiana chinfel a ni anga, chutiang a awm lo a nih chuan dan anga thlapa kalpui zui loh theih loh a ni dawn. Engemaw tia tul lo taka boruak nuam lo deuh siam a nih lohnan thil awm dan hriat tlan a tha kan ti a. Thil lo tih tawh hi sut leh chi pawh niloin a lo fel thlup tawh a, dan anga a hmawr bawk sak chiah hi hmabak ni tawhin a lang. Hemi tur hian Aizawl DC-in tul an tih hunah sawrkarah an thlen chho mai turah ka ngai a, chutih hunah chuan a tul anga bawhzui a ni dawn,” Lalduhoma hian a ti.