Vai pathian hming lam tel ngeiin inhlawh a ngai dawn – Lalnunmawia Chuaungo

On Mar 9, 2026 3 0

Vai pathian hming lam tel
ngeiin inhlawh a ngai dawn
– Lalnunmawia Chuaungo
Ni za inhlawhna – MGNREGA chu central-a BJP sawrkarin a hming thlakin Vai pathiam hming lam tel ngei ngeia inhlawh a ngai tawh dawn tih Congress hruaitu Lalnunmawia Chuaungo chuan a sawi.
Inrinni zinga Serchhipa an party hun hmanah MPCC senior vice president Lalnunmawia Chuaungo chuan, sawrkar laipuiin MGNREGA chu Vai pathian hming lam tel ngei ngei turin VB G RAM G (Ji Ram Ji) tiin an thlak tih a sawi a. India ram chu sakhaw tih bik nei lo, secular state tih ni thin mah se, BJP sawrkar hnuah secular state kan nihna kan hloh tial tial, tiin, ni za inhlawhna hming pawh thlakin, Vai pathian hming min lam tir chu Congress party chuan a duh lo hle tih a sawi.
“Central BJP hian ni za inhlawhna chu tidanglamin ni 125 inhlawhna tur angin sawi mah se, a theih dawn loh. Senso zaa 10 hi state sawrkar tum tur a ni tawh a. Zaa za a nih lai pawhin ni 80 vel bak inhlawhna kan siam thei lo. A ni ti tam mah se kan tlin dawn lo. Thil tha tak anga lang, a taka tha si lo a ni,’ a ti.
Mizoram tana rotling tam tak Congress sawrkarin a lo siam tawh tih a sawi a. Lengpui Airport pawh Congress sawrkar siam, tih changtlun zel ngai a ni a. Congress sawrkar ni lo ten tih tak takin airport tih changtlunna an buaipui ngai lo niin a sawi. Thenawm state Manipur-ah Imphal, Tripura-ah Agartala Airport chu Airport Authority of India (AAI) in vaibelchhe tam tak senga cheiin international airport-ah hlankai an ni tih a sawi a. Lengpui Airport pawh AAI kuta hlan buaipui duh loin ZPM sawrkar chuan IAF kuta dah a sawimawi a. Tunah runway cheinan nakina la rulh leh tur SASCI loan vaibelchhe 90 vel an hmang mek a; MNF lahin cheng vbch 100 dawn sengin airport an chei a, an chei tha thei lo niin a sawi a ni.
Chhungkaw tam zawkten eizawnna ngelnghet an neih theihnan NLUP kal tawh dan ennawn chungin an buaipui leh dawn tih MPCC hruaitu hian a sawi a. “A famkim lo lai leh tha lo lai ngun takin kan zirchiang a, NLUP tha zawk leh changtlung zawk mipui tan chhawp chhuah kan tum. Mizoramah sawrkar hnathawk chhungkua chu chhungkaw 40000 chuang vel chauh an ni a. Chhungkaw tam zawk hi eizawnna mumal neilo an nih avangin an eizawnna tur bultanna atan NLUP kalpui hi Congress party-in kan tih makmawh a ni,” a ti. Health care tha zawk, mipui nawlpui ban phakah private damdawi in tha an hung dawn a, thingtlang lamah primary health care an ngaipawimawh dawn a, PHC an ti changtlung dawn tih a sawi bawk.