Bank hnathawh thlirletnaah bank mi kal tlem vangin notice pek tum

Bank hnathawh thlirletnaah bank
mi kal tlem vangin notice pek tum
Aizawl district-a bank awm ho hnathawh dan thlirletin Thawhlehni khan thutkhawm a ni a. Bank lam aiawh an kal that loh avangin ‘show cause notice’ pek an ni dawn.
Thla thum kalta chhunga District Consultative Committee / District Level Review Committee / District Level Security Committee Aizawl an thukhawm a. Kaihruaitu addl DC Zoramsiama Hmar chuan, a kaihhnawih sawrkar department hotuten he thutkhawm an ngaih pawimawh viau lai a, banker lam zawkin ngaipawimawh loin thahnem tak an kal lo tih a sawi a. Tel lo ho hi show cause notice pek a, thuneitu hnenah thlen a tul dawn tih a sawi.
“He thutkhawm hi bank hrang hrangin engtin nge mipui rawng an bawl tih enletna, hmasawn an ngaihna leh tan lak zual ngaihna lai, bank himna leh a khaihhnawih thil, sawrkar department nen tha zawka thawhho dan tur sawiho leh inhrilhhriatna hun pawimawh a nih angin, thutkhawm ngaihsak lo banker an tam hi a lungawi thlak loh viau a ni,” addl DC hian a ti.
Sawrkar laipuiin mipui hamthatna tura project leh scheme hrang hrang a duante tihhlawhtlin tir tura banker-te leh concern department chu thawkho tur an ni a. Mipui lainatna leh hmangaihna nena tha taka hna thawk turin sawrkar chuan a beisei tih a sawi bawk.
Quarter ended December 2025 chhunga Aizawl district-a overall credit deposit ratio chu 45.46% a ni a, September 2025 quarter (CD ratio 51.69%) aiin 6.21% in a hniam. December 2025 quarter chhunga CD ratio sang ber chu Indian Bank (489.45%) a ni a, a hniam ber chu YES Bank (4.62%) a ni.
Aizawl district-ah hian bank 24 awmin, chu’ng atang chuan CD ratio 20% hnuailam nei bank 4 an awm a. 20% to 30% inkar nei bank 1 awmin, 30% to 40% inkar nei bank 2 a awm. 40% aia tam CD ratio neih bank 17 an awm a ni.