Bangladesh nena inkar tha zel, sipai hotu lawkin a rukin India tlawh

Bangladesh nena inkar tha zel, sipai hotu lawkin a rukin India tlawh
India leh Bangladesh chuan thawm chhuah lem lovin venhimna lama inlaichinna siam that an tan mek a, thla hmasa tawp lam pawh khan Bangladesh military intelligence official lawk pakhat chuan New Delhi tlawhin National Security Adviser Ajit Doval leh thuneitu dangte nen an inkawm niin sawi a ni.
Maj Gen Kaiser Rashid Chowdhury-a hi February 22-a Bangladesh Army-a dinhmun sang chelhtute chanvo siksawina lian tak thlengah Directorate General of Forces Intelligence (DGFI) hotu atana kaisang a ni a. A hnu chawlhkar khat pawh tling lovah hnuah India khawpuiah kum tina Raisina Dialogue tia venhimna lama inrawn khawmna neih thinah a tel niin hemi hretu, an hming tar lan duh lovin an sawi.
Kum 2022 atanga India-a National Security Council Secretariat-in a buatsaih, venhimna thila inrawn khawmnaa a tel bakah hian Chowdhury-a hian Doval-a leh Director General of Military Intelligence, Lt Gen RS Raman te a kawm a. Research & Analysis Wing (RAW) hotupa, Parag Jain-a’n zanriah ei turin a lo mikhual bawk niin an sawi.
Inrawn khawmna emaw, Chowdhury-a’n Indian thuneitute a kawm tih emaw hi India atang chuan sawi chhuah a awm lo va, thla hmasaa Bangladesh-a inthlanpui neih zawh hnua Prime Minister Tarique Rahman-a kaihhruai sorkarin Dhaka-a thuneihna a chan hnua venhim hna thawktu lawkte inkara hetiang inzawmna hmasa ber erawh a ni.
An inkawmna hi Muhammad Yunus-a kaihhruai, Bangladesh-a sorkar lailawk a din chhunga awm lo, ram pahnih inlaichinna tihchangtlunna tura hmalakna pakhata ngaih a ni a. Chowdhury-a’n India-a mi a kawm hi August 2024-a an rama Sheikh Hasina-i sorkar paih thlak hnua an inlaichinna chhe tawh tihnun lehna leh ram pahnihte an inkar titha tura hmalaknaa ngaih a ni.
Bangladesh lamah pawh Chowdhury-a zin hi thup a ni a, report thenkhat phei chuan ‘damdawi lam thil’ vangin New Delhi a pan niin an sawi a. Bangladesh-a chanchinbu hrang hrangte chuan Thawhtanni khan zirlai hruaitu, Sharif Osman Hadi-a thah chungchanga West Bengal-a Bangladesh mi pahnih man chu ‘senior DGFI official’-in India a tlawh atanga chhuak niin an tar lang hlawm.
Ram pahniha mite chuan venhimna lama inlaichinna tihchak tuma hma lak mek a nih thu hi an sawi a; mahse, DGFI chief-in India a tlawh avang mi man nia sawi chu a dik tawk lo tih DGFI chuan a sawi a. Kolkata-a Bangladesh deputy high commission chuan thuchhuah siamin Bangladesh mi pahnih – Faisal Karim Masud, kum 37, leh Alamgir Hossain, kum 34-te man an nih thu Kolkata Police-te hriattir an nih thu leh an hnena ram hnih inpalaina an dap thu an sawi.
Bangladesh chanchinbute chuan Inter-Services Public Relations (ISPR) directorate emaw, sipaia media arm emaw chuan Bangladesh-in chin a hrilh hnuah Indian thuneituten an man niin an tar lang a. Masud-a leh Hossain te hi Hadi thah thubuaia puh ber an ni a, Hadi hi December 18 khan Singapore hospital-ah Dhaka-a kah a nih atanga chawlhkar khat dawnah a thi a ni.
Doval-a hi Bangladesh nena venhimna leh thil pawimawh bika inlaichinnaah chanvo pawimawh tak a chang a. Bangladesh Nationalist Party (BNP) sorkar thara foreign minister atana ruat, Bangladesh-a a thawhpui hlui, Khalilur Rahman nen an indawr a ni.
India hian BNP-in inthlanah hnehna an chang dawn tih a hriat hnuah an inzawmna chu rang taka siam that a duh thu a hriattir a. External Affairs Minister S. Jaishankar-a chuan December 31 khan BNP hotu, Rahman-a hi a nu, prime minister hlui, Khaleda Zia-i vuinaah tel tura Dhaka-a a zin khan a hmu a, Prime Minister Narendra Modi-a lehkha pawh a hlan.
Thla hmasa khan Rahman-a lak luhnaah India aiawhin Lok Sabha Speaker Om Birla leh foreign secretary Vikram Misri te an tel leh bawk.