Alcaraz a chak zel

Indian Wells khelh mekah Thawhlehni zing khan Carlos Alcaraz chuan set hloh hmasa chungin hnehna a chang let a, kum 2026-ah vawi 14 a chak zawn ta chiah. Alcaraz rual hian Novak Djokovic pawhin set hloh chungin hnehna a chang a, last 16 a inhlangkai ve bawk.
Kum bul tan tha tak, 2026-ah hneh theih loha hma lam pan zel Carlos Alaraz chuan last 32-ah Arthur Rinderknech a hmachhawn a, World No. 1 hian rin loh takin set a hloh hmasa. Rinderknech nen hian set khatnaah an inhnehtawk viau a, game an inlak chhawk zak zak hnuin tie-break khelh a ngai nghal. Tie-break-ah pawh rin loh takin Rinderknecha khel tha zui viau a, set la hmasa zawkah a tang teh tlat.
Set hloh hmasa zawk a nih hnuin set hnihnaah Alcaraz hian hliam tenau a nei a, a buai zui mai ang tih a hlauhawm hman hle. Hliam tenau nei bawk mah se hnehna chan let ngei tumin tan a khawh a, a khel tha zui viau nghe nghe. Alcaraz hian set hnihna tir lama break a neih a chhawr tangkai a, harsa lutuk lovin set a la.
Set khat ve ve an lak hnuin deciding set-ah Alcaraz a khel tha leh zual a, a khingpui rthur Rinderknech a che hleithei tawh meuh lo. Game hnih chauh hloh chungin Alcaraz-a’n set a la zui leh ta mai a, a khingpui Rinderknech lakah 6-7(6) 6-3 6-2 a hnehna changin last 16 a inhlangkai a, Casper Ruud a hmachhawn zui leh ang.
Thiamna ril nei tha, tharhui ngah leh huaisen Carlos Alcaraz hi 2026-ah a khel tha tluang hle. Grand Slam-a a la champion ngai lohna Australian Open-ah a vawi khat nan a champion a. Mipa lamah Career Grnad Slam puitlin thei naupang ber a ni nghe nghe. 2026-ah hian inelnaah vawi 14 a inlan tawh a, tlawm a la nei miah lo. A khelh that tluan em vangin last 16-a a khingpui tur Ruud lakah pawh a chak leh ngei a rinawm hle.
Alcaraz laka fiahna hautak hmachhawn tur Casper Ruud hian last 32-a a khingpui 24th seed Valentin Vacherot lakah set a hloh hmasa a, inkhel hmuhnawm takah 3-6 6-3 6-4 a hnehna chang letin last 16 a inhlangkai. A ngam loh thin Alcaraz ngam a tum dawn a, quarter-final a lut thei a nih chuan atan chuan hnehna lian leh chhinchhiahtlak a ni ngei dawn a ni.
Indian Wells khelh mekah hian player ropui Novak Djokovic chu thawhleh zing lam khan a inlan a, Aleksandar Kovacevic a hmachhawn. Grand Slam-a vawi 24 champion tawh Djokovic hian Kovacevic lakah bul tan thain, set la hmasa bawk mah se set hnihnaah erawh a che thei lo viau thung a, game khat chauh lain set a hloh chiang hle. Set hnihnaah che chhe viau mah se set thumnaah tha zawkin a inlan ta thung. Set thumnaah hian break a neih a chhawr tangkai a, game lo hloh chungin set a la a, American Kovacevic lakah hian 6-4 1-6 6-4 in a chak a, last 16 a inhlangkai.Nole hian last 16-ah British number one Jack Draper a hmachhawn zui leh ang.
Drapper hian last 32-a a khingpui world number 20 Francisco Cerundolo chu awlsam tak 6-1 7-5 a hnehin last 16 a lut a, player ropui Novak Djokovic lakah fiahna hautak a hmachhawn zui leh ang.
Thawhlehnia inkhel dangah British number two Cameron Norrie pawhin hnehna a chang a, a khingpui sixth seed, Australia’s Alex de Minaur lakah set hloh lovin hnehna a chang nawlh a, 6-4 6-4 a chakin last 16 a inhlangkai. Norrie hian last 16-ah Alexander Bublik hnehtu Rinky Hijikata a hmachhawn ang.