Iranian supreme leader tharin Strait of Hormuz khar zel tum

An thah tak a pa thlaka Iranian supreme leader thar, Mojtaba Khamenei-a chuan chanvo thar a neih hnua a thuchhuah hmasa berah US leh Israel tangdunin an beih chhan let nan Strait of Hormuz chu an khar chhunzawm zel dawn tih a sawi.
Khamenei-a hi amah inlan lovin a thuchah hi sorkar television presenter pakhatin Ningani khan a chhiar chhuak a. Indo chhuah tan atanga a pa leh a nupui tela a chhungte tam tak an thih phah hnuah a thlalak tihchhuah a la awm lo.
Thuchhuahah hian thinrim takin Khamenei-a hian an thenawm ramte chu an ram chhunga US hmun awmte khar turin a ngen a, Iran-in a beih chhunzawm zel tur thu a sawi bawk.
Iran sipai chak ber nena inhnimhnai tak puithiam chuan, “Martarte thisen phuba lak hi kan ngaihthah lo vang tih mi zawng zawng ka tiam a ni,” a ti.
“Mipuite thil duh chu kan tha taka invenna chhunzawm zel a ni a, hmêlmate inchhira siam a ni a. Strait of Hormuz danchah chu chhunzawm zel a ngai,” tiin khawvel tuialhthei phurh hmun ngaa thena hmun khatin an kaltlang thin Iran tuipui kawng khar chungchang hi a sawi.
Sorkar television hian Khamenei-a thuchah hi amah inlan lova an chhiar chhuah chhan a sawi lo va. Iranian thuneitute chuan February 28-a thlawhtheihna hmanga beihpui thlak hmasak ber tuma a pa an thah rual khan Khamenei-a pawh hian hliam na vak lo a tuar tih an sawi a, a inhliam dan chiah erawh hriat a ni lo.
Khawvel pum huapa energy phurhin harsatna a tawh nasat ber zinga mi thleng mek hian tuialhthei man chu barrel khat $100 chung lamah a kaitir thar leh a, kar tir lama sang vak kha buaina tawp thuai beiseina a awm hnuah a tlahniam leh hman a, a sang leh ta a ni.
A thuchah chhiar chhuah a nih hnu lawkah Revolutionary Guards chuan Khamenei-a thupek angin strait hi khar chhunzawm zel an tum thu an puang zui nghal.
Ningani vek khan Iraqi lawng chawlhhmunah tuialhthei phur lawng pahnih chu Iran puak thei phur lawng ni ngeia hriatin suin a kang bawk a. He thil thleng hi a hma nia US President Donald Trump-a’n indonaah hnehna an chang tih a sawi a dik lohzia tihlannaa chiang taka ngaih a ni.
Iraqi lawng chawlhhmun, Basra atanga video lakah chuan lawngte chu mei alh nasa tak, serthum rawnga alh zuai zuai, zan thima êng pup pupin a lang a. Lawnga thawk pakhat a thi bawk nia sawi a ni.
Hemi hma darkar eng emaw zatah Gulf-ah hian lawng dang pathum kah a ni bawk a. Iranian Revolutionary Guards chuan Thailand bungraw phur lawng lian kang chu an thupek zawm lotu niin an sawi a. Bungraw phur lawng dang pakhat chu United Arab Emirates bulah eng emaw hriat chiah lohvin a fuh bawk.
Ningani khan indona kal mekah hian Israel-in thlawhna atangin Beirut khawpui lailia building pakhat a kap a, Lebanon khawpui chungah meikhu a zam nasa hle.
Israel hian Lebanon khawthlang lam hmun dangah mipuite chu chhuak turin a ti bawk a, Iran-in an thlawp Hezbollah pawlin indona tan atanga Israel-a lam hawia rocket a kah nasat ber tum an thlen hnuah Israeli sipaite hian nasa zawkin beihpui an thlak.
Tun thlengin indona avang hian mi 2,000 chuang an thi tawh a, Lebanon-ah hian mi 700 vel an thi tawh a ni.