Ramriah police check post dah thuai tum Ruihhlo ngaite dim taka enkawl an ngai lo: – Home minister

Lawngtlai district Zochahchhuahah police check post dah thuai turin hma lak a ni dawn tih Home minister K Sapdanga chuan a sawi.
Mizoram chhim lam fanga kal Home minister K Sapdanga hian Inrinni khan India leh Myanmar inri na, Zochachhuah a tlawh a, 23 Assam Rifles duty post tlawhin Mizoram Police ram a en nghal. Ramri kana veivakte uluk taka chhinchhiahna tur Mizoram sawrkarin a neih ve thuai a tul tih sawiin, Mizoram Police-in ram an neih chu detail project report (DPR) siam turin Lawngtlai district bawrhsap a chah a. Mizoram Police Check Post dah thuai thei turin hma lak a ni dawn tih a sawi.
Ramri hnaih khuaa chengte leh Assam Rifles duty-te chuan internet service chhia chuan harsatna a thlen tih an lo sawi a. Border transit progress report siam kawngah pawh harsatna a awm thu an sawi. Mobile network tower awm tura ruahman mek a ni tih minister hian sawiin, chak zawka siam a nih theihnan a lo bawhzui tur thu a sawi.
Kaladan Multi Modal Transit Transport Project (KMMTTP) hawn a nih hunah Mizoram-in kawng hrang hrangin hmasawnna rahbi thar a kai dawn a, sumdawnna lian zawk kalpui niin, Lawngtlai bakah Mizoram hmun hrang hranga chengte tan hmathatna tam tak a thlen dawn tih a sawi a. Hmasawnna hian a chhe zawngin Zoram mipui a nghawng a hlauhawm hle, tiin, tun atanga lo inralrin a, a tha zawnga hmang tura lo inbuatsaih chu hna hmasaa neih a ngaih tih a sawi a ni.
Indo-Myanmar ramri tlawhnaah hian Lawngtlai East bialtu MLA, adviser to chief minister Dr Lorraine Lalpekliana Chinzah, Lawngtlai West bialtu MLA C Ngunlianchunga, sawrkar hotute leh Central YLA hruaituten an tawiawm.
Hemi hnu hian Siaha tlawhin district bawrhsap, superintendent of Police leh tlawmngai pawlte nen Operation Jericho chungchang sawiin an inkawm.
Home minister chuan ruihhlo dotute thusawi ngaithla tura kal an ni tih sawiin, Mizorama tlawmngai pawl hrang hrangte thawhrimna an hriatpui a, an tha tihchak chhunzawm zel an tum, tiin, tlawmngai pawl tha thawh tawhna zawng zawngah lawmthu a sawi a, an phurna tichak zawnga hmalakna khawp sum leh pai leh facility chu a awm tura ngaih a ni tih a sawi.
Mizorama ruihhlo luh ka ber thin – hmar lam leh khawchhak lamah uluk taka ven leh hma lak a nih avangin hmun dangah hlet a chhuah hlauhthawn thuah ramri hrul district tlawhkual a, an thu leh hla ngaihthla paha sawiho thaa an hriat avanga tlawh an nih tih a sawi a ni.
“Sawrkar leh tlawmngai pawlin ruihhlo do kawngah chak taka hma a lak avangin ruihhlo man a to a, a ti thin pawhin an nghei phah a, khawpui chhung a ralmuangin zana vak rawlai an tlem phah pawh hi thil tha tak a ni. Ruihhlo ngaite hi damlo enkawla enkawl an nih hian an damlo der nasa a, hlahthlem bik chi an niin a lang lo. Covid len laiin ruihhlo a lo lut loa, ruihhlo ngai, an nghei vanga thi an tam phah chuang tlat lo. Rilru lama a thawh tel vang ni maiin a hriat. Chuvangin a dim zawng ni loa enkawl a ngamawm a nih hi kan ti,” K Sapdanga hian a ti.