Ram pawn Mizote pualin Chapchar Kut

Ram pawn Mizote pualin Chapchar Kut
Central YMA chuan kumina Aizawla Chapchar Kut hmang tura an sawm, ram pawn atanga Zofa unau rawn kalte pualin March 13 zan khan Chapchar Kut an hmang.
Ram pawn atanga rawn kal zingah Mizo Society of America (MSA), Mizo Society of Australia (MSA), Myanmar Mizo Organization (MMO – USA), China Community of Indianna (CCI- USA) leh Central Mizo Thalai Pawl Burma ten thu an sawi a. Central YMA president R Lalngheta chuan, YMA hian Zofa hnam hrang hrangte tumah a enhrang loa, unau vek kan nih avangin inpumkhat tlat tur leh tangho tlat turin a sawm tih a sawi. Raltlan zingah fel lo deuh leh tha lo deuh an awm a, a tul chuan an hau zel anga, a felte erawh inthlahrun tur a ni lo, tiin a sawi bawk.
He hunah hian Mizo Society of America, Mizo Society of Australia, MMO – USA, CCI- USA, Burma atanga Mizo pawl hrang hrang – Central Mizo Thalai Pawl Burma; Varpui Youth Association, Letpanchaung Youth Association, Mizo Welfare Organization, Segyi Youth Association, Tahan Mizo Thalai Pawl, Tuingo Youth Association, Varpui Youth Association an tel a. Tripura atangin Hrangkhawl Youth Association leh Rengzo Joint YMA (Darlong), Tripura Group YMA bakah Manipur Group YMA an tel bawk.
Central YMA assistant secretary SF David Ngursangzuala kaihhruaiin heng pawl hrang hrang hi Central YMA hminga ngaihhruina hlan a ni a, Central YMA president hlui T Sangkunga’n a hlan a ni.