Iran atangin Armenia & Azerbaijan-ah Indian 650 vel lut tawh

Iran atangin Armenia & Azerbaijan-ah Indian 650 vel lut tawh
Israel leh US tangdunin Iran an beih mek laiin Indian 650 velin haw tumin Iran atanga khawmual ramriah Armenia leh Azerbaijan an thleng tawh tih external affairs ministry-in a sawi.
Tun hnaiah Iran atangin Indian 550 chuangin Armenia an lut a, mi 90 velin Azerbaijan-ah an lut bawk niin external affairs ministry thupuangtu, Randhir Jaiswal-a chuan Asia khawthlang dinhmun chungchanga Thawhtanni tlaia thuthar lakhawmtute a kawmnaah a sawi a. “Hetianga kalna hi Tehran-a kan embassy-in hmalakna a ni a, a tulnaah visa leh immigration-ah kan pui a ni,” a ti.
Armenia-a Indian lut zingah hian Iran-a biakzina kal 284 an tel a. “Thenkhat chu (India-ah) an kir leh tawh a, thenkhat chu ni rei vak lo hnuah an kir leh thei bawk ang,” tiin Jaiswal-a chuan a sawi.
Iran hmun hrang hranga awm darh Indian-te hian February 28-a indona a intan atanga Iran chunga thlawhna thlawhna khar a nih avangin Armenia leh Azerbaijan panna kawngpui an zawh a ngai a, hemi hma hian a tam zawk chu zirlai Indian mi za tam tak, chu Tehran atangin hmun himah sawn an ni tawh a. Indona tan tirh khan Indian 9,000 vel Iran-ah hian an awm a ni.
Tehran-a Indian embassy chu harsatna karah pawh ‘a dan pangngai ang rengin’ a la kal a, tuipuia thawk Indian-te leh sangha mantute nen pawh an inbepawp reng niin Jaiswal-a chuan a sawi.
Shipping ministry-a Special Secretary Rajesh Kumar Sinha-a chuan Directorate General of Shipping-in tun thlengin Gulf bial atanga tuipuia thawk Indian 286-te hruai kir theihna tur a siam tih a sawi ve bawk a. Hetah hian Pathianni atanga thlawhna tumhmun hrang hrang leh hmun dang atanga lawnga chuang mi 10 hruai haw an tel.
External affairs ministry-a Additional Secretary (Gulf) Aseem Mahajan-a chuan thuneituten Asia khawthlnga thil awm dan inthlak chu an thlithlai reng tih sawiin he biala cheng Indian maktaduai 10-te himna tur an ngaihen tih a sawi a, tangkhang mek leh hun rei lote chhunga tlawhtute tanpuina pek an nih thu sawiin visa pekna tur puihna, veivah dan tur inkawmhmuhna leh an haw theih dan tur ruahmanna siamsak te pawh a tel tih a sawi.
February 28 atang khan Asia khawthlang atangin India-ah khualzin 2,20,000 an haw tawh a. Pathianni-a drone hmanga beih a nih hnua hun eng emaw chen Dubai international airport-a hna thawh chawlhsan a nih hnuah zawi zawia chhunzawm leh tan a ni a, Indian leh Emirati carrier-te chuan Abu Dhabi, Ras al Khaimah leh Fujairah-a tumhmun atangin thlawhna tlem an thlawhtir bawk.
Oman leh Saudi Arabia-a tumhmun hrang hrang atangin India hmun hrang hrangah thlawhna a thlawk bawk a, Qatar chung boruak chu a then hawn a ni a, Qatar Airways chuan an ramah thlawhna a thlawhtir mek bawk a. Kuwait chung boruak chu February 28 atang khan khar a ni tawh a; mahse, Jazeera Airways-in a bikin ruahman lawk loh sumdawng thlawhnate chu Saudi Arabia-a Al Qaisuma international airport atangin India-ah a thlawk dawn niin Mahajan-a chuan a sawi.
“Boruak kharna, Bahrain leh Iraq-a Indian-te tan Saudi Arabia kaltlanga kal theihna tur siam a ni,” a ti bawk.