Ruihhlo tawlhtute beih turin Ecuador-in sipai 75,000 chuang tir

Ruihhlo tawlhtute beih turin Ecuador-in sipai 75,000 chuang tir
Ecuadorean sorkar chuan an rama tharum thawhna nasat ber berna province paliah police officer leh sipai 75,000 chuang a tir tawh niin interior minister-in a sawi.
Thuneitute chuan heng hmunahte hian zan lama inkharkhip an puang a, hei hi mi sual pawlte laka ‘indona’ an kalpui meka ‘thawh thar’ a ni.
November, 2023-a thuneihna a chan atang khan President Daniel Noboa-a hian ruihhlo kaihhnawih tharum thawhna tihtawp tumin hma a la a; mahse, Ecuador-ah hian kum 2025 khan tualthah tam record thar an nei thung.
Noboa-a hian khawvel chhim lam huapa mi sual pawlte beih tuma US kaihhruaia ram 17 intawlkhawmna pawl a zawm tawh bawk.
Ecuadorean Interior Minister John Reimberg-a chuan El Oro, Guayas, Los Ríos leh Santo Domingo de los Tsáchilas province-a chengte hnenah, ‘Indona kan kalpui mek,” a ti.
“Risk engmah la suh, chhuak suh, in lamah awm rawh,” a ti bawk.
Khawvela cocaine siamtu lian ber pahnih, Colombia leh Peru inkara awm, Ecuador hi dan lova ruihhlo tawhna ram pawimawh takah a chang mek.
Colombia leh Peru-a cocaine siam chhuah zinga 70% vel chu Ecuador kaltlanga thawn chhuah thin nia chhut a ni.
Noboa-a sorkar hian Ecuador atanga US-a cocaine thawn thin tihtawp tumin US President Donald Trump-a sorkar nen an thawk dun.
Kar hmasa khan FBI chuan Andean ramah hian office hmasa ber a hawng a, hei hi ram pahnihten ruihhlo dona kawnga thawhhona an neih hnu lawkah a ni.
Noboa-a hi Latin America hruaitu zinga Mar-a-Lago-a Trump-a buatsaih international meeting-ah tel zinga pakhat a ni a. US thuneitute meeting hi ‘Shield of the Americas’ summit tiin an sawi nghe nghe.
Summit-ah hian Trump-a chuan mi sual pawlte hi ‘cancer’ nen a tehkhin a, a Latin American thiante chu sipai chakna hmanga a zung kai chhuah turin a ngen a. “A darh zel hi kan duh lo,” a ti.
An thutkhawm zawhah hian Noboa-a hian social media-ah Trump-a bula a ding thlalak a tar lang a, “Hun rei tak mafia-ten America hi an ram a ni tih an ngaihtuah a. Harsatna awm lovin ramri an kân a, ruihhlo, silai leh tharum thawhna an thlen a. An hun a tawp tawh a ni,” tiin a tar lang.
Noboa-a hian a hna a chelh hnuah a ram chhunga mi sual pawlte chu tharum nena do a tum a, emergency eng emaw zat a puang tawh a; mahse,kum 2024 leh 2025 inkar khan tualthahna rate hi 30% chuang zetin a pung thung.