Oil leh gas-ah harsatna la awm lo Myanmar-a oil kaltir phal an vei
Tunlaia indona avanga oil leh gas supply a pangngai theih loh avangin khawvel a buai a. India leh Mizoram pawh he buaina thleng thei hian a tuam mek. Mizoram sawrkar chuan tun thlengin oil leh eirawngbawlna gas-ah harsatna a la awm lo tih a sawi a. Chutihlaiin a bikin petrol leh diesel engemawzat Myanmar lama dan ang ni loa la lut reng vei na a na sawt hle tih sawi a ni.
The Aizawl Post-in thu a dawn danin, oil hi Myanmar lamah Siaha leh Lawngtlai district kaltlanga luhpui a tam ber a. Champhai lamah chuan chuti taka ngaimawh leh mit tikham thamin a lut lo nia sawi a ni. Siaha leh Lawngtlai district nena inri Myanmar lam hi tunlai Myanmar tualchhung buainaah Myanmar sawrkarin a awp meuh tawh loh lam a ni a, sawrkar dotu Arakan Army-in a awp tam ber.
Hetihlai hian India leh China-in Myanmar an inchuhna karah sawrkar bakah heng, a ramchhunga huamchin nei awptu sawrkar dotu pawl pawh biak that tel vek an ngaih avangin Myanmar inchuhtu ram pahnih hian hma an la ve ve a, ram leh ram anga dan ang taka indawr a rem loh avangin ‘mit siai’ chin deuh awmin hetiang hian zalen takin bungrua hi a kal vel a; Mizoram lam hnaih Arakan Army (AA) awp mek Rakhine state pawh chumi zar zotu zingah telin, oil bakah nitin mamawh leh bungraw thenkhat a lut tam tih sawi a ni.
Thudawnna pakhat sawi danin, tunhma chuan Bangladesh lam atang pawhin a lut nasa a, Rakhine state-a cheng Mosolman sakhaw betu ho AA-in an nawrchhuah vak hnu, thu kal zelah Bangladesh lam atanga heng supply lak hi a harsat phah ta nia sawi a ni.
“Dan ang taka thil tih hleihtheih loh, ram leh ram inkar thil ni bawk si a ni a, sawrkar laipui lam pawh hian phalrai chin a nei lo thei lo niin a lang,” The Aizawl Post thudawnna chuan a ti.
Hetianga oil leh thildang Mizoram kaltlanga Myanmar lama a lut reng hi veitu an awm ve mek bawk tih sawi a ni a. Tih tawp a nih theihnan mimal leh pawl anga hma la pawh an awm nia hriat a ni. District magistrate thenkhat chuan oil hi bur/zem anga dawh phal lohna thupek an tichhuak mek bawk.