Lawngtlai leh Siaha district inkal pawhna Tuisumpui luia lei hawng

Siaha district leh Lawngtlai district inkalpawhna kawng pawimawh, Tuisumpuia (Tisópi) luia Bailey bridge dawhkai chu Inrinni zing khan PWD chief engineer David Sapzova’n a hawng.
Siaha leh Tuipi Ferry, PMGSY kawng Saiha- Rawmibawk Road-a awm Tuisumpuia lui hi Siaha district lam Tuipui Ferry, Riasika, Amotlah leh Thiahra khua thlunzawmtu leh Lawngtlai district nena an inkalpawhna kawng a ni a. Lei a awm loh avang hian furpui lai chuan tuilian vanginheng khaw tarlan ho hi lirthei chu sawi loh, kea kal tan pawh tlawhpawh hleih theih an ni lo thin a. Tuisumpui luiah hian Tuipi Ferry khawtlang leh a bulhnai khuaten seasonal bridge (thing leh mau hmanga siam lei) kum tin an dawh thin a, lirthei phur tir deuhin a zawh changin a him tawk loa, lei pawh hi a daihrei thei thin lo tih sawi a ni.
Kum 2023 atang khan sawrkarin thir lei dawh kai turin hma a la tan a. SASCI sum atangin cheng nuai 150 hmuh a ni. Contractor atana thlan Lalparmawia, Hlimen Aizawl chuan 2023 October 20 atang khan hna tanin, sum awmsa atang hian thir lei lian leh nghet zawk dawh turin a daih loa, 2024- 2025 sawrkar kum khan sawrkarin nuai 250 dah belh lehin hemi hmang hian thawh chhunzawm a ni a, kumin February 23 khan zawhfel a ni.
Mara ADC hnuaia Amótlah bialtu MDC HC Lalmalsawma Zasai chuan a bial khua ten kum 30 chhung an lo nghah tawh, sawrkar hmasa hun atanga bul tan a, tun sawrkarin a zawhna tur chhunzawma Bailey bridge tha tak dawh a ni ta chu an lawm hle tih a sawi a, hna a puitlin theihna tura theihtawp chhuahtu Mizoram PWD hotute chungah an lawm tih a sawi bawk.