‘LPG chungchangah manganna tur a awm lo’

‘LPG chungchangah
manganna tur a awm lo’
Nilaini khan Siaha district bawrhsap VL Hruaizela Khiangte hovin Siaha district-a tuialhthei (petroleum, oil & lubricants) leh eirawngbawlna gas (liquefied petroleum gas) dinhmun an sawiho a, mipui tan manganna tur a awm lo an ti.
He hunah hian Siaha district Joint control room member-te an tel, Joint Control Room member-te chu District Administrator, Police, DCSO leh DIPRO official-te an ni.
Bawrhsap chuan March 20, 2026-ah tuialhthei lei leh hralh chungchangah thupek chhuah a nih tawh thu a sawi a, “Siaha district tana lo thleng tuialhthei leh eirawngbawlna gas hi hmun dang leh ram dangah a chhuah kan remti lo, ram chhunga cheng mipui (consumer) te hi dah pawimawh hmasak ber tur a ni,” a ti.
Kawnga thang mek pawh a thlenna tur hmun thleng lova hruai kawi leh khawih chingpen a awm loh nan chak taka hma lak a ni, a ti bawk.
Mipuite chu thuneitute thu ngaichang thiam tura chahin, thupek tha taka zawm a nih hian mipuiin rualkhai takin kan ni tin mamawh tawk kan chang thei a, chutiang ni lova mahni duh zat zat kan lei chuan mi dangte tan harsatna kan siam thei a ni, a ti. Mipuite chu um leh thawl (gallon) hmanga tuialhthei la lo turin a chah a, a thawkte pawh chutianga lak phal lo turin a hrilh bawk.
Joint control room meeting chuan Siaha district chhungah dik leh felfai taka tuialhthei leh eirawngbawlna gas lei leh hralh a nih theih nan Filling station leh Gas Agent-ah te Closed-Circuit Television (CCTV) vuah ni se, District Administrator, SP leh DCSO-in vil se tih an rel a, tun dinhmunah ni tin mamawh a thleng tha a, district chhunga cheng mipuite tan tuialhthei leh eirawngbawlna gas-ah thlaphanna tur a awm lo an ti.