Iran-in indo tihtawp nana Trump-a rawtna hnawl, rawtna nei ve nghal

Iran-in indo tihtawp nana Trump-a rawtna hnawl, rawtna nei ve nghal
Iran chuan US President Donald Trump-a’n indona tihtawpna tura ruahmanna a neih point 15 chu a hnawl niin sorkar enkawl Press TV-in a tar lang.
‘Political-security thuneitu sang’ pakhat, a hming tar lan lovin buaina tihtawp a nih theihna tura Tehran-in a thil duh a neih panga a siam a tar lang tel a, hetah hian indona avanga thil chhiate rulh let an duh thu pawh a tel.
Trump-a’n rawtna neih nen hian he rawtna hi a inang lo hle a, US thuneituten a awm tih an finfiah hnua Israel Channel 12 network-in a tihchhuah a ni a. Rawtna zingah hian Iran-in nuclear ralthuam siam lo tura a intiamna leh kawng pawimawh, Strait of Hormuz hawn lehna tur pawh a tel.
Indona hi February 28-a US leh Israel tang dunin van sang atanga an kah atanga intan kha a ni a, a chhanlet nan Iran-in Gulf-a American tanpui ramte beihin indona huang a zauh phah hle a ni.
Thawhlehni khan Trump-a chuan Iran hian ‘inbiak an duh hle’ tih a sawi a, Iranian aiawhte chuan US hnenah ‘lawmman pawimawh tak’ an pe tih a sawi bawk.
‘Tunlai boruak’ chu tuialhthei leh boruakalhthei leh Strait of Hormuz nena inzawm a nih thu US president hian a sawi bawk a, a bak a sawi thui lo.
Hetih lai hian Iranian parliament speaker chuan inbiakna neih tura rawtna awm anga sawi chu a nih loh thu a sawi tlat thung.
Mohammad Bagher Ghalibaf-a chuan, “US nen inbiakna engmah neih a la ni lo a, thu thar dik lo hmangin sum leh tuialhthei sumdawnnate tihdanglam leh US leh Israel talbuaina luipui atanga chhuah nan an hmang a ni,” tiin X-ah a tar lang.
Israel Channel 12-in a tar lan US rawtna ang chuan Iran hian indona a tawp theih nan thil phut eng emaw zat hlen chhuah a ngai.
US thuneituten indona intan chhan ber nia an sawi, Iran-in nuclear ralthuam siam a tihtawpna tur pawh a tel a, hei hi Tehran-in a hnawl fo thin a ni a. Missile programme a neih pawh tihtawp phutna a tel.
Rawtnaah hian Iran chu ‘nuclear ralthuam siam tum ngai lo tura thu tiam’ siam tura tih a ni a, nuclear hmunhmate tihchhiat leh uranium a tihchakna zat pawh UN hnuaia nuclear thlithlaitu, International Atomic Energy Agency (IAEA) hnenah hlan pawh a tel a ni.
Iran-in missile a siamah a kah phak tawk bituk leh a siam zat tihtlem pawh rawtna pawm tura ruahmanah hian a tel.
Hei bakah hian Iran hian a chhehvel, Lebanon-a Hezbollah, Gaza-a Hamas leh Yemen-a Houthi te sum a pek a tihtawp a ngai dawn bawk.
Iran-in Strait of Hormuz a hawng ang bawk a. Heng hi pawm pawm a nih chuan Tehran-in hrekna a tawrh zawng zawng hlih a ni ve thung dawn a ni.
Israel leh US-in a Iran nuclear hmunhma leh sipai hmun eng emaw zat an bomb avangin Iran hian a nuclear hmunhma an endiksak thin chu a titawp a, November khan a laka hrekna pawh kalpui leh tan a ni.
Trump-a’n indo tihtawpna tura rawtna a neih chhang hian Iran chuan rawtna panga a nei ve nghal tih Press TV chuan a tar lang.
Heng zingah hian ‘hmelmaten an beihna leh an thahna’ tihtawp vek a tel.
Israeli Prime Minister Benjamin Netanyahu-a leh a hote chuan ‘octopus lu tan’ an tum thu an sawi fo va. Indo tan ni atangin Supreme Leader Ayatollah Ali Khamenei leh Iranian thuneitu sangeng emaw zat an thi tawh.
Iran-in rawtna a neih dangah ‘Islamic Republic-a indona hi tihbuai leh a nih loh nan intiamkamna nghet tak’ siam a tel a; mahse, hei hi eng intiamna nge tih erawh a chiang lo.
Eibar lamah pawh Iran hian indonaa chhiatna thlengte rulhna pek a phut bakah Strait of Hormuz-a mahni chauha enkawl chhunzawm theihna tur dikna chanvo pek a phut bawk.