ZPM sawrkarin AMC thunun phawta inthlanpui min tum – Lalnunmawia Chuaungo

ZPM sawrkarin AMC thunun
phawta inthlanpui min tum
– Lalnunmawia Chuaungo
ZPM sawrkarin a hunah Aizawl Municipal Corporation inthlan hmachhawn an ngam loa, an thunun phawt hnu ah min inthlanpui an tum tih Congress hruaitu Lalnunmawia Chuaungo chuan a sawi.
Thawhtannia an party office-a inkhawmah MPCC senior vice president Lalnunmawia Chuaungo chuan, ZPM sawrkarin a hunah AMC min inthlanpui ngam loa, an thununna, thuneihna an kuta lak phawta min inthlanpui an tum, tiin a sawi. Tuna kawng an siam chu mipui sum, mipui sum thehkhawm a ni, tiin, sawrkar hmasate pawhin kawng an lo siam ve thin ang tho khan an siam ve a ni mai a, mipui vote an hmuh belh vak a rinawm loh, tiin a sawi bawk.
Congress an sawrkar leh chuan sawrkar kalphung an thlak danglam anga, an hamthatna atan thuneihna an hmang ve dawn lo tih a sawi. Health care siamthat chu an ngaihpawimawh tur zing ami a ni, tiin, changtlung zawka kalpui an tum tih a sawi a. Natna a nasat hmaa inenkawlna, primary health kan ngaihthah em em chu ngaihpawimawh a ngai tih sawiin, “Natna a nasat hmaa natna hmuhchhuah leh enkawl hi Congress kan sawrkar chuan kan ngaipawimawh dawn a, natna hmuhchhuah zung zung a nih theihnan Primary Health Center kan ti changtlung anga, laboratory changtlung tak kan din sak zel dawn a ni,” a ti.
Education Reform an kalpui anga, primary education an ngaipawimawh dawn tih MPCC hruaitu hian a sawi. Hei vang hian higher education an ngaihthah dawn tihna ni loin, a bul – primary education ah tan an la nasa dawn tihna a ni, tiin, “Kan tu leh fate zirna bul hi kan ngaihthah thiang loa, a ler atanga thuai chi a ni lo,” a ti.
MNF sawrkar kalta khan politic-a hlawkpuinan education a hmang a, ZPM pawhin chutiang tho chuan hlawkpui tumin hmanruaah a hmang a, Congress chuan an ti ve dawn lo tih a sawi a ni.
“Sawrkar chuan development a buaipui tur a ni a, sumdawng a ni loa, sumdawnna kalpuinan hman tur a ni lo. Tuna sawrkar hnathawh tam tak hi private sumdawngten an khawih tur a ni a, chu chuan hna tam tak, private sector-ah a siamchhuak anga, sawrkar inrelbawlna a lo tlem anga, chu chu ram leh mipuiin an hlawkpui dawn a ni. Chutiang chuan sawrkar kalphung hi siamthat a ngai a, chu chu kan ngaipawimawh dawn,” Lalnunmawia Chuaungo hian a ti.