Hnahthialah damlo awmpui- tute riahna tur hmun siam

Hnahthialah damlo awmpui-
tute riahna tur hmun siam
District Hospital Hnahthial-a damlo awm awmpuitute chawlh hahdamna leh riah theih nghalna tur in ruahman thar chu Thawhtanni khan South Tuipui bialtu MLA Jeje Lalpekhlua’n a hawng.
MLA chuan damlo enkawl tura kalpui, thlenna neih that loh vanga harsatna tawk thinte harsatna sutkianna atan ‘Patient Attendant Shelter’ hi ruahman a ni tih a sawi a. He building awm theihna atana hma latu leh thawktute chungah lawmthu sawiin, a nihna tur dik taka hmang a, mi harsa zawkte duhsak nachang hre thin turin a chah.
Patient Attendant Shelter hi Shelter For Urban Homeless Scheme hnuaiah UD&PA department chuan Rs. 38,80,440 sengin a sa a. 2024 March 6 khan sak tan niin 2025 May 26 khan sak zawh a ni.
Building hi chhawng hnih niin, a hnuai zawkah bedroom pahnih, sitting room pakhat, inthiarna pakhat leh choka pakhat a awm a. A chungah bedroom pakhat, dormitory pakhat, inthiarna pahnih leh sitting room pakhat a awm. District Hospital bul lawkah awmin a enkawl chhunzawm hna hi District Hospital kuta dah a ni.