Manipur-a Naga hel inkahnaa NSCN pali thi

National Socialist Council of Nagalim (NSCN) Eastern Flank faction-a tel pali chu Manipur-a Kamjong district-a Naga hel pawlte inkara inbeihna chhuakah an thi tih thuneituten Pathianni khan an sawi.
Thuneitute chuan inkahna hi Inrinni zan dar 08.30 leh dar 09.20 vela Manipur-a Kamjong district-a Kasom Khullen block hnuaia Hongbei khaw bul, Imphal-Kasom Khullen kawngpuia thleng a ni tih an sawi bawk.
Eastern flank-a tel helte hi National Socialist Council of Nagalim – Issac Muivah (NSCN-IM) pawla mi nia rin an ni a, lambun nia hriat an ni a. An zinga pali an thi a, pahnih chu hliam tuarin an tlan chhuak thei.
Thite hming hi People’s Republic of Nagalim (Eastern Flank), Naga Army sorkarin thuchhuah a siamah tar lan a ni tawh a. Major (mahnia invuah) Sochipem Phungshok, Sergeant Major (mahnia invuah) Zairay Vasah, Sergeant (mahnia invuah) Bahnle Ahlahpya leh Sergeant (mahnia invuah) Thansomi Washi te an ni.
People’s Republic of Nagalim (Eastern Flank), Naga Army sorkarin thu an chhuah, ‘Lt. Gen. A. Raman-a’ hming a ziah hnan chuan an pawl chuan an mite an hloh chu ‘a lungchhiatthlak hle’ tih an sawi a, ‘an hna an thawhnaah kah hlum’ an nih thu an sawi bawk.
Thuchhuah tar lan danin heng mite hi Indo-Myanmar ramria thing leh mau enfiaha kal niin chawhma lamah Hongbei khua an paltlang a. Lairam khuaa 2nd Lt. Starling tia hriatte kaihhruai pawla mite nen pawh an inbia nia sawi a ni a, a hnuah an haw kawngah Shihai Khunou khuaa 2nd Lt. Mathotmi kaihhruai pawl nen pawh an inbei nia sawi a ni.
Eastern Flank chuan a tirah chuan an inkap mai lo va, silai hmeh puah tura thupek chhuah a ni zui ta niin an tar lang a. “Anmahni an ni, kap rawh u,” tih thupek chhuah a ni tih sawiin, hetiang thupek hi ‘2nd Lieutenant chauh atanga chhuak a ni thei lo’ niin an sawi a, hruaitu lu zawk atanga chhuak a ni thei tih an sawi a, ‘Longvibu’ (commander-in-chief) pawh a ni thei tih an sawi.
Thuchhuah hian NSCN/GPRN Ministry of Information leh Tangkhul Naga Long ten a hmaa an tanhmun an lo tihchhuah tawhte pawh tar langin an mite chu he an thupek ang hian an thawk a, Naga pawl hrang hrangte inpumkhatna atan an bei niin an sawi.
Kasom Khullen atanga police kalte chuan Pathianni tuk khan a hmun an en fiah a, an chhui chhunzawm zel bawk.