Goa-ah Chapchar Kut hmang

Goa-ah Chapchar Kut hmang
Goa Mizo Welfare chuan Thawhlehni khan Chapchar Kut 2026 an hmang a. Goa-a zirna leh hna avanga awm tharte lawmna hun hman nghal a ni bawk.
Hmanpuitu Central YMA president R Lalngheta chuan, Mizo thalai rual fel tak tak, mahni tan leh chhungte hnenah Mizoram budget-a tel miah lo sum thawn thei engemawzat an awm chu ram leh hnam tan an hlu hle tih sawiin, “Thalai rual la rawn kal leh zel turte tan ambassador in ni,” a ti.
Mizo thalaite chu zu leh ruihhlo avanga buai mai mai hman kan ni tawh lo, tiin, zu tamna hmunah pawha zu in ngai lo thalai tam tak an awm avangin Mizo an ti hmingtha a, midang tan hnathawh ve na tur kawng an hawng zel tih a sawi bawk.
Central YMA finance secretary MS Ralte pawhin Mizote hnama min dintu Pathian-in Zofate kan intihhlimna hun atan Chapchar Kut min pe chu kan vannei a, kan hlut deuh deuh tur a ni tih a sawi a. State dang ram dangah awm mah se, mahni hnampui ngei nupui pasala nei turin a chah tih a sawi a ni.
Member 1200 chuang awmna Goa Mizo Welfare-in Chapchar Kut an hmanna hi Welfare president Rev Lalrinsanga’n a kaihruaia, hnam lam chi hrang hrang entir niin, zaithiamin zaiin an awi bawk a, tlaiah Kut ruai an theh a ni.