MNF AMC sawrkarin duhsak zawng hnenah tipper an tiral – ZPM Thalai president

Aizawl Municipal Corporation-a MNF sawrkar chuan sawrkar danin tih ral hun a tih pawh la thleng lo bawlhhlawh paihna atana lirthei an dawn chu an duhsak zawng hnenah man man takin an hralh niin ZPM Thalai president Jeje Lalpekhlua, MLA chuan a sawi.
ZPM Thalai Hqrs. president hian thuchah siamin, Comptroller and Auditor General of India (CAG) Report tarlan danin, State Investment Project Management and Implementation Unit (SIPMIU) Aizawl chuan 2017 October 3 khan khawpui chhunga bawlhhlawh paihna tur lirthei thar, tipper 50 leh pik up 4 a vaia cheng vaibelchhe 10.28 man chu AMC hnenah a hlan a. Heng lirthei zinga 45 hi kum 2018 khan MNF kaihhruai AMC sawrkarin tlawm uchuak takin a tiral leh vek tih a sawi.
“Mizoram Condemnation and Disposal of Government Vehicles Rules 2011-ah chuan lirthei hi kum10 a tlin hnuah emaw km. nuai 2 a tlan tlan hnuah chauh tihral phalna a pe a. Lirtheiin a chesual palh a, sum leh pai lama siamthat theih loh a nih chauhin a hun hma in an tiral thei ang, tih danah a awm bawk. Mahse, AMC Board of Councillors chuan December 2018 khan bawlhhlawh paihna truck hi privatise turin thutlukna an siam a, technical inspection-ah lirthei hi an dinhmun a tha tih finfiah chungin, official-ten ‘economic repair atan an fit tawh lo’ tiin thutlukna an siam a, tipper pakhat zelah cheng nuai 5.64 in an duhsak zawng hnenah an pe a ni,” a ti.
MNF AMC sawrkarin induhsakna uchuak tak hmanga Aizawl mipui leh Mizo mipui hmai a ti bal chu ZPM Thalai chuan pawi a ti a, a thlen nawn tawh lohnan corruption laka fihlim tur ngei ZPM AMC candidate-te thlang tling turin an ngen tih a sawi a ni.