BTS-in YouTube chart-ah ro an rel

On Apr 6, 2026 0 0

BTS-in YouTube chart-ah ro an rel
K-pop superstar BTS chuan streaming platform lian YouTube Global Top Songs chart top 100-ah an hla 11 an lanpui thei a, chung zingah chuan an hla hit thar ber ‘Swim’ chu No.1 a ni. BTS hian an comeback album ‘ARIRANG’ an hlawhtlinpui hle a, he album atanga an lead single ‘Swim’ music video-in khawvel huapin view maktaduai 83 chuang a kai nghal a, Global Top Songs chart-ah an No.1 pui ta a ni.
‘Swim’ hi YouTube US Top Songs-ah pawh No.1 a ni a, he chart No.1-a an hla lang thei pangana a ni. US-a BTS fan-ten ‘Swim’ music video hi chart cycle chhungin vawi maktaduai 6.2 an en hman a, YouTube-a US atanga K-pop video cycle khat chhunga entu ngah ber a la ni a, a hmaa he record siamtu KPop Demon Hunters “Golden” chu view maktaduai 2 chuangin a rawn khum.
BTS comeback album ARIRANG hi khawvel ram hrang hrang chart-ah pawh a hlawhtling hle a, he album-a hla ‘Swim’ hi Billboard Hot 100 (US singles)-ah pawh No.1 niin, he chart-a BTS hla No.1 ni thei pasarihna a ni a, a album pawh hi Billboard 200 (US albums) chart-ah No.1 niin, he chart-a an album No.1 kai thei pasarihna a ni bawk.
Billboard Global 200 (ram hrang hrang 200 chuang a hla lar dan tehna) chart-ah pawh ‘Swim’ hi No.1 niin, chart top 10-ah an hla pakua a lang thei bawk a, Taylor Swift record nihrualin, Global 200 Top 10-a tum khata hla ngah ber an ni.
ARIRANG album hi March ni 20-a tlangzarh kha niin, music streaming platform lian Spotify chuan he album i 2026-a ni khata album stream nasat ber a nih thu an puang tawh a, Spotify history-a Kpop album stream nasat ber record a siam tawh bawk.
BTS sawi takah chuan an music video thar ‘2.0’ an tichhuak a, sawidan tlanglawnah chuan ‘2.0’ hi thil inthlak leh danglam ta deuh zawk, system, technology emaw thil tihdan emaw, lo danglam ta deuh sawi nan an hmang thin a, BTS ‘2.0’-ah hi chuan an rawn piangthar a ni deuh ber. Khawvela group huhang nei lian ber ni mek te hian ‘reset button’ an rawn hmet a ni deuh ber a, mahse, thil danglam hlawk lam a kawk lo va, anmahni tak tak an rawn phochhuah takna lam an hawi tir a ni. Idols mite ngainat rawn an la ni tho a, mahse, tunah chuan an chhungril lam nihna tak tak an rawn pholang ta a ni ber mai.