‘Dhurandhar 2’-in vbc 1600 a hnaih ta

Bollywood star Ranveer Singh, Rakesh Bedi, Sanjay Dutt leh Arjun Rampal te channa ‘Dhurandhar: The Revenge’ chuan an tlangzarh atanga ni 17 chhungin cinema hall ticket hralhna atangin khawvel huapin cheng vaibelchhe 1550 chuang la lut tawhin, cheng vaibelchhe 1600 a la lut thei ngei dawn niin a lang. He film hi March ni 19-a tlangzarh kha niin, India bikah pawh net collection (cinema hall ticket hralhna atanga sorkara entertainment tax an pek leh tawh hnuah) cheng vaibelchhe 985.02 a la lut tling tawh a, gross collection (cinema hall ticket hralhna, engmah an la cut hma)-ah chuan India-ah cheng vaibelchhe 1179.30 a tling tawh a, India ram pawna a lak luh cheng vaibelchhe 385 nen chuan a vaiin cheng vaibelchhe 1564.30 a tling tawh. He film hi Hindi, Kannada, Malayalam, Tamil leh Telegu a tihchhuah a ni a, Hindi hi a sum hmuh tam berna niin, Hindi film zinga India-a sum la lut tam ber a ni pha bawk.
Indian film zinga (Hindi chauh ni lo) India-a cinema hall ticket hralhna atanga sum la lut tam ber chu ‘Pushpa 2: The Rule’ kha niin, India-ah cheng vaibelchhe 1,234.10 a tlin thei a, a dawttu ni thin ‘Baahubali: The Conclusion’-in cheng vaibelchhe 1030.42 a tlin thei a, Baahubali 2 hi chu a rawn lehpel tawh a ni.